Yaponiya Xarici İşlər Nazirliyi Suriyaya 53 milyon dollar məbləğində maliyyə dəstəyi göstəriləcəyini açıqlayıb.
Cagdas.azın xəbərinə görə, Nazirliyin yaydığı məlumatda bildirilib ki, xarici işlər nazirinin müavini Onişi Yohei dekabrın 22-də Suriyaya səfər edib. Səfər çərçivəsində o, Suriyanın maliyyə naziri Məhəmməd Yasir Berniyə və digər hökumət nümayəndələri ilə görüşlər keçirib. Onişi qeyd edib ki, bu səfər təxminən son 15 il ərzində yüksək vəzifəli yaponiyalı rəsminin Suriyaya etdiyi ilk ziyarətdir.
Görüşlər zamanı Onişi Yaponiyanın Suriyada inklüziv, sülhə əsaslanan və sabit keçid prosesinin təmin olunmasına yönəlmiş səyləri dəstəklədiyini vurğulayıb. O qeyd edib ki, iki ölkə arasında münasibətlərdə yeni mərhələnin əsası qoyulub.
Nazir müavini əlavə edib ki, Yaponiya Suriya ilə iqtisadi əməkdaşlığı davam etdirməkdə qərarlıdır və cari maliyyə ilinin büdcəsində bu ölkə üçün 53 milyon dollar həcmində yardım vəsaiti nəzərdə tutulub.
