Birləşmiş Millətlər Təşkilatının Təhlükəsizlik Şurasında nüvə danışıqlarının yenidən başlanması gündəmi ilə keçirilən toplantı ABŞ və İran arasında yaranan fikir ayrılığı səbəbindən gərgin şəraitdə başa çatıb. Tərəflər şərtlər üzərində razılığa gələ bilməyiblər.
Cagdas.az xəbər verir ki, ABŞ “uranın sıfır zənginləşdirilməsi” şərti ilə İranla birbaşa danışıqlara hazır olduğunu bir daha bəyan edib. İran isə Vaşinqtonun irəli sürdüyü bu tələbləri ədalətsiz sayaraq qəbul etmədiyini bildirib.
Təhlükəsizlik Şurasının İranın nüvə proqramı ilə bağlı keçirdiyi iclasda çıxış edən ABŞ Prezidenti Donald Trampın Yaxın Şərq üzrə nümayəndəsinin müavini Morqan Ortaqus deyib ki, ABŞ İranla birbaşa və məzmunlu dialoqa açıqdır. O vurğulayıb ki, ABŞ üçün əsas prinsip İran ərazisində uranın zənginləşdirilməsinə yol verilməməsidir.
İranın BMT-dəki daimi nümayəndəsi Əmir Said İrevani isə ABŞ-ın “sıfır zənginləşdirmə” siyasətində israr etməsinin ədalətli danışıqlar anlayışı ilə uyğun gəlmədiyini bildirib. Onun sözlərinə görə, İran Nüvə Silahlarının Yayılmasının Qarşısının Alınması Müqaviləsinin (NPT) üzvü olaraq müəyyən hüquqlara malikdir və bu hüquqların inkar edilməsi məqbul deyil.
İrevani qeyd edib ki, İran ədalətli və məzmunlu bütün danışıqlara açıqdır, lakin ABŞ-ın öz şərtlərini diktə etməyə çalışması konstruktiv yanaşma deyil. O əlavə edib ki, İran heç bir təzyiqə və təhdidə boyun əyməyəcək.
