ABŞ Prezidenti Donald Tramp İranla əldə olunmuş atəşkəsin uzadıldığını açıqlayıb. Bu qərar qlobal maliyyə bazarlarında ciddi dalğalanmalara səbəb olub.
Çağdaş.Az xəbər verir ki, atəşkəsin uzadılması nəticəsində beynəlxalq bazarlarda gərginliyin azalacağı gözləntiləri güclənib. Bu isə neft qiymətlərinin enməsinə, dolların zəifləməsinə və səhmlərin dəyərinin artmasına yol açıb. Riskin yüksəlməsi fonunda qızıl və digər qiymətli metallar isə bahalaşıb.
Spot qızılın qiyməti 0,9 faiz artaraq unsiya üzrə 4 755,11 dollara yüksəlib. ABŞ-da qızıl fyuçersləri də 1,1 faiz artaraq 4 772,90 dollar səviyyəsinə çatıb.
Məlumata görə, Tramp İranla atəşkəsi sülh danışıqlarına vaxt qazandırmaq məqsədilə müddətsiz olaraq uzadıb. Lakin bu qərarın birtərəfli olduğu, İran və ABŞ-ın müttəfiqi İsrailin mövqeyinin isə hələlik dəqiq olmadığı bildirilir.
Analitiklər hesab edirlər ki, atəşkəsin uzadılması Yaxın Şərqdə gərginliyin azaldığı siqnalı kimi qəbul edilib və bu, bazarlarda optimizmi artırıb. Bununla yanaşı, enerji qiymətlərinin enməsi inflyasiya təzyiqlərini də zəiflədib.
Ekspertlər qeyd edirlər ki, neft qiymətlərinin artması adətən inflyasiyanı yüksəldir, qızıl isə inflyasiyaya qarşı qoruyucu aktiv kimi çıxış edir. Lakin yüksək faiz mühitində investorlar daha çox gəlir gətirən aktivlərə yönəldiyi üçün qızıl bazarı da dalğalı davranır.
Digər qiymətli metallar da bahalaşıb: gümüş 1,5%, platin 1,5%, palladium isə 1,8% artım göstərib.
