Aliment verən tərəf burada çox güman ki, böyük əksəriyyəti Azərbaycan tərəfi olacaq”.
Cagdas.az xəbər verir ki, bunu Milli Məclisin bu gün keçirilən plenar iclasında deputat Siyavuş Novruz “Mülki, ailə və cinayət işləri üzrə hüquqi yardım və hüquqi münasibətlər haqqında 2002-ci il 7 oktyabr tarixli Konvensiyaya dəyişikliklərin edilməsi barədə Protokol”un təsdiq edilməsi haqqında qanun layihəsinin müzakirəsi zamanı deyib.
Onun sözlərinə görə, alimentlərin ödənilməsi və uşaqların hüquqi yardımla təmin olunması məsələsində bəzi boşluqlar var idi, xüsusən də valideynlərdən biri xaricdə yaşadıqda:
“Bu konvensiyalara edilən əlavələr həmin boşluqları aradan qaldırır. Bizə seçicilər tərəfindən çoxlu müraciətlər gəlir. Elə ailələr var ki, boşanmadan sonra valideyn məsuliyyətdən yayınmaq üçün başqa ölkəyə gedir və uşağın saxlanması üçün vəsait ödəməkdən imtina edir. Bu isə uşağın həm təhsilinə, həm də gündəlik təminatına mənfi təsir göstərir.
Yeni sənədin qəbulu imkan verəcək ki, dövlətlər arasında hüquqi mexanizmlər daha çevik işləsin. Yəni, bir ölkənin məhkəməsinin çıxardığı qərar digər ölkədə də tanınsın və icra olunsun. Bu, həm də o deməkdir ki, heç kim dövlət sərhədlərini bəhanə edərək uşaq qarşısındakı öhdəliyindən qaça bilməyəcək”.
Millət vəkili qeyd edib ki, aliment verən tərəf burada çox güman ki, böyük əksəriyyəti Azərbaycan tərəfi olacaq:
“Çünki bizim həmvətənlərimiz Rusiyada, Ukraynada, Belarusda, Moldovada, o cümlədən başqa yerlərdə nikaha giriblər, evləniblər, dünyaya uşaq gətiriblər və ondan sonra bir neçə ildən sonra, bir neçə on ildən sonra köçüb vətənlərinə qayıdıblar. İndi məhkəmə qaydasında o uşaqların saxlanılması aliment tələb olunanda, bu alimenti verməlidir. Və biz də gələcəkdə fikirləşirik ölkəmizdə aliment fondu yaradaq. Belə yaransa, elə aliment fondunun böyük əksəriyyəti onlara gedəcək. O baxımdan mən hesab eləyirəm ki, burada hansısa bir forma düşünməliyik. Konvensiyaya qoşulmaqla biz insan hüquqlarına olan diqqətimizi göstəririk, amma ölkəmizin də olan vəsaitlərinin sərf olunmasına da nəzarət etməliyik”.
