Azərbaycanın xaricdən ən çox aldığı məhsulların idxal siyahısında minik avtomobilləri, dərman vasitələri, polad prokatı, buğda və bitki yağları ön sıralarda yer alır. Rəqəmlər ölkənin həm gündəlik istehlak, həm də sənaye və ərzaq təminatı baxımından xarici bazarlardan aldığı məhsulların çeşidini göstərir.
Cagdas.az xəbər verir ki, Dövlət Statistika Komitəsinin məlumatına əsasən, 2026-cı ilin yanvar-avqust aylarında Azərbaycanın idxalı 11 milyard 423,4 milyon dollar təşkil edib. Bu, ötən ilin eyni dövrü ilə müqayisədə nominal ifadədə 24,1 faiz, real ifadədə isə 40,1 faiz azdır.
Bəs Azərbaycanın xaricdən aldığı əsas qeyri-neft-qaz məhsulları hansılardır?
Dövlət Statistika Komitəsinin açıqladığı siyahıda idxal dəyərinə görə ilk 10 yeri tutan məhsullar bunlardır:
1. Minik avtomobilləri
Azərbaycanın xaricdən aldığı məhsullar arasında minik avtomobilləri ilk sıradadır. 2026-cı ilin yanvar-avqust aylarında ölkəyə 42 min 755 avtomobil gətirilib. Ötən ilin eyni dövrü ilə müqayisədə idxalın nominal dəyəri 36,6 faiz, real həcmi isə 37,4 faiz azalıb.
2. Dərman vasitələri
Dərman vasitələri idxalın əsas istiqamətlərindən biridir. Hesabat dövründə bu məhsullar üzrə idxalın dəyəri 308,3 milyon dollar təşkil edib. Ötən ilin eyni dövrü ilə müqayisədə nominal dəyər 0,6 faiz azalsa da, real həcmdə 26,3 faizlik azalma qeydə alınıb.
3. Polad prokatı
Sənaye və tikinti sahələrində istifadə olunan polad prokatı idxalda üçüncü yerdədir. İlk səkkiz ayda 247,4 min ton bu məhsul idxal edilib. İdxalın nominal dəyəri 1,6 faiz artsa da, real həcmi 4,1 faiz azalıb.
4. Buğda
Ərzaq təminatı baxımından mühüm məhsul olan buğda Azərbaycanın idxal siyahısında ön sıralarda qərarlaşıb. Yanvar-avqust aylarında ölkəyə 841,7 min ton buğda gətirilib. Ötən ilin eyni dövrü ilə müqayisədə idxalın nominal dəyəri 13,3 faiz, real həcmi isə 10,8 faiz artıb.
5. Bitki yağları
Bitki yağları da Azərbaycanın xaricdən aldığı əsas məhsullardandır. Hesabat dövründə bu məhsulun idxalı 102 min tona yaxın olub. İdxalın nominal dəyəri 27,5 faiz, real həcmi isə 22,4 faiz artıb.
6. Qara metallardan borular
Sənaye və infrastruktur layihələrində istifadə edilən qara metallardan borular da idxalın mühüm hissəsini təşkil edir. İlk səkkiz ayda bu məhsullar üzrə idxalın dəyəri 149,2 milyon dollar olub. Ötən ilin eyni dövrü ilə müqayisədə nominal dəyər 8,1 faiz, real həcm isə 8,4 faiz artıb.
7. Xam şəkər
Xam şəkər də Azərbaycanın xaricdən aldığı əsas məhsullar sırasındadır. 2026-cı ilin yanvar-avqust aylarında bu məhsulun idxal dəyəri 139,9 milyon dollar təşkil edib. Ötən ilin eyni dövrü ilə müqayisədə nominal dəyər 3,6 faiz, real həcm isə 21,1 faiz artıb.
8. Təzə meyvə
Azərbaycan xaricə meyvə satmaqla yanaşı, xarici bazarlardan da təzə meyvə alır. Hesabat dövründə ölkəyə 103,4 min ton təzə meyvə gətirilib. İdxalın nominal dəyəri 17,9 faiz, real həcmi isə 11,3 faiz artıb.
9. Hesablama maşınları, blok və qurğular
Texnologiya və informasiya avadanlıqları da idxalda əhəmiyyətli yer tutur. Yanvar-avqust aylarında hesablama maşınları, blok və qurğular üzrə idxalın dəyəri 127,5 milyon dollar olub. Ötən ilin eyni dövrü ilə müqayisədə nominal dəyər 21,6 faiz, real həcm isə 3,1 faiz artıb.
10. Kərə yağı və digər süd yağları
İlk onluğun sonuncu pilləsində kərə yağı və digər süd yağları qərarlaşıb. Hesabat dövründə bu məhsulların idxal dəyəri 102,4 milyon dollar təşkil edib. Ötən ilin eyni dövrü ilə müqayisədə nominal dəyər 17,4 faiz, real həcm isə 8,1 faiz azalıb.\modern.az\
