ABŞ kəşfiyyatının hesabatlarında bildirilir ki, Rusiya Prezidenti Vladimir Putin Ukraynanın bütün ərazisini ələ keçirməyi, eyni zamanda keçmiş Sovet İttifaqına məxsus Avropadakı bəzi bölgələr üzərində iddialar irəli sürməyi qarşısına məqsəd qoyub. Bu qiymətləndirmələr ABŞ kəşfiyyatına yaxın altı mənbəyə əsaslanır.
Cagdas.az-ın xəbərinə əsasən, hesabatda vurğulanır ki, hazırda danışıqlar aparan tərəflər Rusiyanın nəzarətində saxladığından xeyli az ərazi ilə kifayətlənməsi şərti ilə müharibəni başa çatdırmağa çalışdığı bir vaxtda, kəşfiyyatın ortaya qoyduğu mənzərə ABŞ Prezidenti Donald Trampın və Ukrayna üzrə sülh danışıqlarını aparan nümayəndələrin Putinin münaqişəni bitirmək istədiyi barədə qənaətindən kəskin şəkildə fərqlənir. Mənbələrdən birinin sözlərinə görə, ən son kəşfiyyat hesabatı sentyabr ayının sonunda hazırlanıb.
ABŞ kəşfiyyatının əldə etdiyi məlumatlar Putinin “Avropa üçün təhlükə yaratmadığı” ilə bağlı açıqlamaları ilə də ziddiyyət təşkil edir. Mənbələr bildirir ki, Vaşinqtonun bu qiymətləndirmələri Rusiyanın 2022-ci ildə genişmiqyaslı işğala başlamasından bəri dəyişməz qalıb və Avropa liderləri ilə kəşfiyyat qurumlarının mövqeləri ilə böyük ölçüdə üst-üstə düşür. Həmin məlumatlara əsasən, Putin Ukraynanın tamamını, eləcə də NATO üzvü olan keçmiş sovet blokuna aid ölkələrin ərazilərini ələ keçirməyi hədəfləyir.
ABŞ Nümayəndələr Palatasının Kəşfiyyat Komitəsinin demokrat üzvü Mayk Kuqli Reuters agentliyinə açıqlamasında bildirib ki, kəşfiyyat məlumatları hər zaman Putinin daha artıq ərazilər istədiyini göstərib. Onun sözlərinə görə, avropalılar buna inanır, polyaklar bu təhlükəni qəti şəkildə real hesab edir, Baltik ölkələri isə ilk hədəfin məhz özləri olduğunu düşünür./Haber Global/
