ABŞ ordusu İran limanlarına giriş və çıxışları əhatə edən bütün dəniz nəqliyyatına qarşı abluka tətbiq edəcəyini açıqlayıb.
Çağdaş.Az xəbər verir ki, ABŞ ilə İran arasında İslamabadda aparılan danışıqların nəticəsiz qalmasından sonra Vaşinqtondan diqqətçəkən addım gəlib. ABŞ Mərkəzi Komandanlığı (CENTCOM) İran limanlarına giriş-çıxış edən bütün gəmilərə qarşı dəniz blokadası tətbiq olunacağını bildirib.
Məlumata görə, qərar ABŞ Prezidenti Donald Tramp tərəfindən verilib və blokada aprelin 13-də Türkiyə vaxtı ilə saat 17:00-dan qüvvəyə minəcək.
Açıqlamada qeyd olunub ki, blokada Fars körfəzi və Oman körfəzi də daxil olmaqla İranın bütün liman və sahil bölgələrinə daxil olan və ya bu ərazilərdən çıxan bütün ölkələrin gəmilərinə şamil ediləcək.
Bununla yanaşı, CENTCOM qüvvələrinin İran xaricindəki limanlara gedib-gəlmək üçün Hörmüz boğazından istifadə edən gəmilərin hərəkət azadlığına mane olmayacağı vurğulanıb.
blokada başlamazdan əvvəl ticarət gəmilərinə müvafiq məlumatlandırmanın ediləcəyi bildirilib və bölgədən keçəcək bütün gəmilərə ABŞ Hərbi Dəniz Qüvvələri ilə əlaqə saxlamaq tövsiyə olunub.
