Bu dəfə Öndər.tv komandası olaraq Masallı rayonunun Viləş kəndinə üz tutduq.
Səfərimizin məqsədi Aprel döyüşləri zamanı qəhrəmancasına şəhid olan gizir Nurlan Əsgərlinin və 44 günlük Vətən müharibəsi zamanı şəhidlik zirvəsinə ucalan Vətən Müharibəsi Qəhrəmanı gizir İntiqam Əsgərlinin əziz xatirəsini yad etmək, eyni zamanda “Şəhid qardaşları” ev muzeyinin açılış mərasimində iştirak etmək idi.
Viləş kəndində keçirilən tədbir olduqca duyğusal anlarla yadda qaldı. Şəhidlərin ailə üzvləri, yaxınları, döyüş yoldaşları və kənd sakinləri bir araya gələrək qəhrəman oğulların xatirəsini ehtiramla yad etdilər.
Açılışı edilən ev muzeyi təkcə bir ailənin deyil, bütövlükdə xalqın qürur mənbəyinə çevriləcək müqəddəs bir məkan kimi dəyərləndirilir. Muzeydə şəhid qardaşların şəxsi əşyaları, hərbi geyimləri, təltifləri, fotoşəkilləri və döyüş xatirələrini əks etdirən materiallar nümayiş olunur. Şəhidlik İslam dinində ən uca məqamlardan biri sayılır.
Bu zirvəyə yüksələn insanlar cənnətlə mükafatlandırılır və xalqın yaddaşında əbədi yaşayırlar. Tarix boyu olduğu kimi, Azərbaycan xalqı da müqəddəs dəyərləri uğrunda mübarizədən çəkinməmiş, Vətən torpaqlarını qorumaq naminə saysız-hesabsız igidlər yetişdirmişdir. Bu gün üzərində yaşadığımız torpaqlar şəhidlərimizin qanı ilə yoğrulub. Azad, təhlükəsiz və xoşbəxt həyatımızı məhz onların fədakarlığına borcluyuq. Hər bir Azərbaycan vətəndaşının borcu isə bu qəhrəmanları unutmamaq, onların xatirəsini daim yaşatmaq və gələcək nəsillərə ötürməkdir. Şəhid qardaşlarının atası Bayram müəllim və anası, qürurlu Azərbaycan qadını Ziba xanım övladlarını vətənpərvər ruhda böyütmək üçün böyük zəhmət çəkiblər. Ziba xanım bildirir ki, övladlarının hərbçi olmasını məhz özü arzulayıb və bu yolda onlara hər zaman dəstək olub.
Aprel döyüşlərində ilk şəhid olan Nurlan Əsgərli subay idi. O, ağır yaralı olduğu anlarda qardaşı İntiqamla son dəfə görüşərək ürəyində qalan ən böyük arzusunu dilə gətirir: “Arzum Şuşaya bayraq sancmaq idi.” Bu sözlər qardaşının həyatına və gələcək taleyinə istiqamət verən bir vəsiyyətə çevrilir. Nurlanın şəhidliyindən dörd il sonra Azərbaycan Ordusu əks-hücum əməliyyatlarına başlayır. 44 günlük Vətən müharibəsi dövründə hər bir əsgərin məqsədi yalnız qələbə qazanmaq deyil, həm də şəhidlərin qisasını almaq idi. İntiqam Əsgərli də qardaşına verdiyi sözü yerinə yetirmək əzmi ilə döyüşlərə qatılır. O, döyüş yolu boyunca böyük şücaət göstərərək Şuşa istiqamətində gedən əməliyyatlarda iştirak edir və nəhayət, müqəddəs şəhərdə Azərbaycan bayrağını dalğalandıraraq həm qardaşının arzusunu reallaşdırır, həm də onun qisasını alır. Bu an təkcə bir ailənin deyil, bütün xalqın qürur anına çevrilir. Lakin qəhrəmanlıq yolu bununla bitmir. Müharibənin son günü – 9 noyabr tarixində İntiqam Əsgərli ağır yaralanır və şəhidlik zirvəsinə ucalır.
Beləliklə, iki qardaş da Vətən uğrunda canından keçərək Azərbaycan tarixində silinməz iz qoyur. Bu gün Viləş kəndində açılan “Şəhid qardaşları” ev muzeyi gələcək nəsillər üçün bir məktəb, bir vətənpərvərlik ocağıdır. Buraya gələn hər bir insan bu igidlərin həyat yolundan ilham alacaq, Vətən sevgisinin nə qədər müqəddəs olduğunu bir daha anlayacaq.
