Çexiyanın Baş naziri Andrey Babiş ölkəsinin Ukraynaya maliyyə dəstəyi ilə bağlı heç bir fövqəladə zəmanətlər verməyəcəyini açıqlayıb. O, bu barədə Çexiya parlamentinin aşağı palatası olan Deputatlar Palatasının Avropa Məsələləri Komitəsinin iclasında çıxışı zamanı danışıb.
Cagdas.az-ın xəbərinə görə, baş nazir bildirib ki, Çexiya Avropa İttifaqının Ukraynaya dəstək göstərməsinin vacibliyini şübhə altına almır. Bununla belə, onun sözlərinə görə, bu dəstək indiyədək olduğu kimi konkret maliyyə mexanizmləri əsasında həyata keçirilməlidir.
“Çexiya Ukraynaya dəstəyin zəruriliyini sual altına qoymur. Ancaq bu yardım indiyədək olduğu kimi maliyyələşmə ilə təmin olunmalıdır. Biz hər hansı fövqəladə maliyyə zəmanəti verməyəcəyik”, – deyə Andrey Babiş CTK xəbər agentliyinə bildirib.
Qeyd edək ki, Çexiyanın baş naziri yaxın günlərdə Avropa Şurasının iclasında iştirak edəcək. Həmin toplantıda Avropa İttifaqının Ukraynaya əlavə yardım göstərməsi məsələsinin müzakirə olunacağı gözlənilir.
