İraqda fəaliyyət göstərən, lakin İran İslam İnqilabı Mühafizəçiləri Korpusunun (SEPAH) bilavasitə təsiri altında olan Nücəba silahlı birləşməsi Azərbaycanla bağlı hədələyici açıqlamalarla gündəmə gəlib. Qruplaşma formal olaraq İraqda fəaliyyət göstərsə də, müstəqil aktor hesab olunmur və İran tərəfindən maliyyələşdirilən, siyasi və təhlükəsizlik məqsədləri üçün istifadə olunan silahlı strukturlardan biri kimi tanınır. Bu tip qruplaşmalar zaman-zaman İraq ərazisində ABŞ və onun rəhbərlik etdiyi koalisiya qüvvələrinə qarşı da müxtəlif hücumlarda iştirak edib.
Cagdas.az-ın xəbərinə görə, Referans Media-ya açıqlamasında politoloq Natiq Miri bildirib ki, Nücəba qruplaşmasının istənilən bəyanatı və hədəsi birbaşa SEPAH-ın sifarişi kimi dəyərləndirilməlidir. Onun sözlərinə görə, qruplaşmanın adının “nəcib” anlayışı ilə assosiasiya olunmasına baxmayaraq, fəaliyyəti terror xarakteri daşıyır və bu, insanlığa ziddir.
Politoloq qeyd edib ki, Nücəbanın Azərbaycanı hədəfə alması yeni hal deyil və bu, son dövrlərdə İran rəsmilərinin səsləndirdiyi bəyanatlarla da üst-üstə düşür.
Natiq Miri xatırladıb ki, İranın xarici işlər naziri son Azərbaycan səfəri zamanı ABŞ və İsrailə dəstək verən ölkələrin cavab tədbirləri ilə üzləşə biləcəyini bəyan edib və bu kontekstdə Azərbaycan da dolayı şəkildə hədəf kimi göstərilib. Onun sözlərinə görə, Azərbaycan xarici işlər naziri Ceyhun Bayramovun iranlı həmkarı ilə telefon danışığında Azərbaycan ərazisinin heç bir ölkəyə qarşı istifadə olunmayacağı barədə açıqlaması da bu mövzunun gündəmdə olduğunu göstərir.
Politoloq əlavə edib ki, 12 günlük İsrail – İran qarşıdurmasından sonra da SEPAH-a yaxın dairələr Azərbaycanı əsassız şəkildə ittiham etməyə davam edir. Halbuki bu iddialarla bağlı konkret faktlar mövcud deyil və İran Prezidenti Məsud Pezeşkian da bunu açıq şəkildə etiraf edib. Politoloqun fikrincə, bu vəziyyət Azərbaycanla münasibətləri gərginləşdirməkdə maraqlı olan müəyyən dairələrin mövcudluğunu göstərir.
Ekspert vurğulayıb ki, Azərbaycan qonşu dövlətlərlə dinc yanaşı yaşama prinsipinə sadiqdir və heç vaxt öz ərazisinin başqa ölkələrə qarşı istifadə olunmasına imkan verməyib. Onun fikrincə, Azərbaycana qarşı düşmənçilik İran üçün heç bir strateji qazanc gətirmir, əksinə, normal qonşuluq münasibətləri İranın təhlükəsizliyi və iqtisadi inkişafı baxımından daha məqsədəuyğundur.
Gülnaz Abdullazadə
