ABŞ Prezidenti Donald Trampı NATO Liderlər Zirvəsinə gətirən prezident təyyarəsi dünya miqyasında böyük marağa səbəb olub. “Air Force One” çağırış kodu ilə uçan xüsusi təyyarə Türkiyəyə doğru hərəkət edərkən eyni anda minlərlə insan tərəfindən izlənilib.
Çağdaş.Az xəbər verir ki, ABŞ liderini daşıyan “Boeing VC-25” tipli prezident təyyarəsi ABŞ-dan havaya qalxaraq Ankaraya istiqamət alıb. Uçuş məlumatlarını təqdim edən “Flightradar24” platformasının göstəricilərinə əsasən, təyyarə qısa müddət ərzində dünyanın ən çox izlənilən uçuşu olub.
Platformada “AF1” çağırış kodu ilə göstərilən prezident təyyarəsinin marşrutu minlərlə istifadəçi tərəfindən canlı izlənilib. Məlumata görə, eyni anda 5 mindən çox insan təyyarənin hərəkətini izləyib.
ABŞ prezidentinin istifadə etdiyi təyyarə xüsusi təhlükəsizlik sistemləri, rabitə imkanları və uzun məsafəli uçuş qabiliyyəti ilə dünyanın ən tanınmış dövlət təyyarələrindən biri hesab olunur.
Donald Trampın Türkiyə səfərinin əsas məqsədi NATO Liderlər Zirvəsində iştirak etməkdir. ABŞ Prezidenti Ankara görüşləri çərçivəsində müttəfiq ölkələrin liderləri ilə danışıqlar aparacaq.
Trampın Türkiyə Prezidenti Rəcəb Tayyib Ərdoğanla görüşündə müdafiə sənayesi, regional təhlükəsizlik, enerji əməkdaşlığı və beynəlxalq gündəmdəki məsələlərin müzakirə olunacağı gözlənilir.
ABŞ prezidentini daşıdığı müddətdə xüsusi təyyarə “Air Force One” adlandırılır və bu uçuş kodu yalnız ölkə prezidentinin olduğu zaman istifadə olunur.
