Azərbaycanda saxlanılan Rusiya vətəndaşlarının tezliklə azad edilməsini istəyirik.
“Cagdas.az” xəbər verir ki, bunu Rusiya Xarici işlər nazirinin müavini Mixail Qaluzin “İzvestiya”ya verdiyi müsahibədə deyib.
“Xüsusilə, Azərbaycan tərəfi bu yaxınlarda diplomatlarımızın bu vətəndaşlarla, soydaşlarımızla konsulluq əlaqəsini yeniləməsinə razılıq verib. Beləliklə, bu məsələ tam gündəmdədir və soydaşlarımızın mümkün qədər tez azad edilməsinə çalışmağa davam edəcəyik”, -deyə, Qaluzin açıqlamasında bildirib.
Qaluzin yenə də Rusiyanın Azərbaycan hökumətinin Bakıda ləğv etdiyi “Rus evi”nin bərpasına çalışdığını deyib: “Əlbəttə ki, münasibətlərimizin çox vacib mədəni və humanitar komponentini, o cümlədən Rusiyanın Azərbaycanın mədəni və humanitar məkanında iştirakını normallaşdırma prosesinin bir hissəsi olaraq bərpa etməyə sadiqik. Gündəmimizdəki mövzulardan biri də “Rus evi”nin işi də daxil olmaqla, humanitar iştirakımızın bərpasıdır”.
Göründüyü kimi, Rusiya Azərbaycana qarşı törətdiyi açıq düşmənçiliklərə – Rusiyadakı azərbaycanlılara qarşı repressiyalara, AZAL təyyarəsinin vurulmasına dair cinayət işini bağlamasına, günahkarları cəzasız buraxmasına, heç bir kompensasiya ödəməməsinə, eləcə də ölkəmizə qarşı kiberhücumlar da daxil olmaqla, çoxsaylı təxribatılara rəğmən, Azərbaycanda “humanitar iştirakını bərpa etməkdə”, yəni, “yumşaq güc”dən istifadə etməkdə israrlıdır. Bu “yumşaq güc” isə ona imkan yaradıldıqda, Ukrayna təcrübəsinin də göstərdiyi kimi, istənilən an qaba hərbi gücə, işğala çevrilə bilir./AzPolitika.info/
C.Məmmədli
