52 yaşlı bədən tərbiyəsi müəllimi Bai Jian 276 uşağı övladlığa götürdükdən sonra “Çinin super atası” kimi tanınıb.
Cagdas.az xəbər verir ki, onun hekayəsini “South China Morning Post” qəzeti yazıb.
Bai Jian Çinin şimal-şərqindəki Liaoninq əyalətindəki Anshan №2 orta məktəbində bədən tərbiyəsi müəllimidir.
1995-ci ildən bəri ən azı 276 uşaq Bai tərəfindən “Dream Home” adlanan mülkdə yaşayır.
Belə ki, Jian ilk uşağını 1995-ci ildə övladlığa götürüb. O, məktəbdə təzə işə başlayan zaman bir şagird diqqətini çəkib. Oğlan tez-tez dərsləri buraxır və sinif yoldaşlarından yemək oğurlayırdı. Çox keçmədən Jian valideynlərinin onu tərk etdiyini öyrənib və onunla yaşamağa dəvət edib.
Həmin andan müəllim getdikcə daha çox yetimlərə kömək etməyə başlayıb. O, övladlığa götürdüyü bütün uşaqları idmanla tanış edib. Jian onları hər gün səhər 4:30-da oyadır və qaçmağa aparır. Hava şəraitindən asılı olmayaraq, onlar hər gün 12 kilometrdən çox məsafə qət edirlər.
Jian 46 yaşında evlənib. Əvvəllər bütün sevgililəri onun xeyriyyə işlərinin öhdəsindən gələ bilmədiklərinə görə tərk etmişdilər. 2020-ci ildə isə bir oğlu olub.
“Heç vaxt yorğunluq hiss etmirəm. Uşaqları və idmanı sevirəm. Hər gün sevdiyim işlə məşğul oluram”, – deyə Jian qeyd edib.(qafqazinfo)
