Birləşmiş Ərəb Əmirlikləri Hörmüz boğazından yan keçən boru kəmərləri və Fuceyrə limanı vasitəsilə alternativ enerji marşrutu quraraq qlobal enerji bazarında mövqeyini gücləndirir.
Çağdaş.Az xəbər verir ki, bu barədə beynəlxalq analitik materiallarda qeyd olunur.
Məlumata görə, İran ətrafında gərginliyin uzanması ehtimalı Hörmüz boğazının bağlanması riskini artırır və alternativ marşrutlara tələbat yaradır.
BƏƏ-nin əsas üstünlüklərindən biri onun həm körfəz, həm də Ərəb dənizi sahillərində yerləşməsidir. Xüsusilə Fuceyrə limanı artıq neft və neft məhsullarının saxlanması və daşınması üzrə mühüm qlobal mərkəzlərdən biridir.
Hazırda fəaliyyət göstərən Habşan–Fuceyrə boru kəməri BƏƏ-yə nefti birbaşa Oman körfəzinə çıxarmağa imkan verir. Bu kəmərin ötürmə gücü gündəlik təxminən 1,5–1,8 milyon barel təşkil edir.
Bununla yanaşı, Cəbəl-Dhanna–Fuceyrə boru kəməri layihəsinin də həyata keçirilməsi planlaşdırılır. Təxminən 1,5 milyon barel/gün gücündə nəzərdə tutulan bu xəttin 2027-ci ildə istifadəyə verilməsi gözlənilir.
Ekspertlər hesab edirlər ki, bu marşrut gələcəkdə yalnız BƏƏ üçün deyil, region ölkələri üçün də alternativ ixrac və logistika dəhlizi rolunu oynaya bilər.
Beləliklə, yaxın illərdə Hörmüz boğazının qlobal enerji daşımalarındakı dominant mövqeyinin zəifləməsi və BƏƏ-nin yeni strateji enerji qovşağına çevrilməsi ehtimalı artır./Modern.az/
