ABŞ zərurət yaranacağı halda milli maraqlarını qorumaq üçün Qərb yarımkürəsində hərbi əməliyyatlara hazırdır. Bu barədə ABŞ-ın müdafiə naziri Pit Heqset bildirib.
Çağdaş.Az xəbər verir ki, ABŞ Nümayəndələr Palatasının Silahlı Qüvvələr Komitəsində keçiriləcək dinləmələr üçün hazırlanan çıxışında Heqset qeyd edib: “Biz bütün hallarda qonşularımızla xoş niyyət əsasında əməkdaşlığa hazırıq, lakin onlar da ortaq maraqları qorumaq üçün üzərlərinə düşəni etməlidirlər. Əks halda, Müdafiə Nazirliyi ABŞ maraqlarını irəli aparmaq üçün məqsədyönlü və qəti addımlar atmağa hazırdır.”
Pentaqon rəhbərinin sözlərinə görə, “illərlə davam edən laqeydlikdən sonra ABŞ Qərb yarımkürəsində hərbi üstünlüyünü bərpa edəcək.”
Heqset bu bölgədə strateji əhəmiyyət daşıyan ərazilər kimi Panama kanalı, Meksika körfəzi və Qrenlandiya adasını göstərib. O vurğulayıb ki, ABŞ bu ərazilərə hərbi və kommersiya baxımından maneəsiz çıxış imkanına malik olmalıdır.
Nazir əlavə edib ki, Vaşinqton rəqiblərinin Qərb yarımkürəsində silahlı qüvvələr yerləşdirməsinə və ya təhlükə yarada biləcək digər imkanlar qurmasına imkan verməyəcək.
