“Azərbaycan genişmiqyaslı bərpa və yenidənqurma prosesinə başlayıb”.
Çağdaş.Az xəbər verir ki, bunu xarici işlər naziri Ceyhun Bayramov Ümumdünya Şəhərsalma Forumunun 13-cü sessiyası (WUF13) çərçivəsində baş tutan “Əlaqələndirmənin mərkəzində şəhərlər: şəhər yenidənqurması və regional əməkdaşlıq” mövzusunda tədbirdə çıxışı zamanı deyib.
“Burada şəhərlər, qəsəbələr və kəndlər dayanıqlı inkişaf, “ağıllı şəhər” idarəçiliyi, “yaşıl enerji” və insanmərkəzlilik prinsipləri əsasında yenidən qurulur. Azad edilmiş ərazilərdə həyata keçirilən genişmiqyaslı bərpa və məcburi köçkünlərin geri qaytarılması Azərbaycanın sülh gündəliyinə sadiqliyinin açıq göstəricisidir.
Təxminən 15 milyard ABŞ dolları həcmində investisiya ilə Azərbaycan regionda münaqişə səhifəsinin bağlanmasına səmimi marağını nümayiş etdirir. Bu bərpa prosesi sülh quruculuğunun ayrılmaz hissəsidir. Uzunmüddətli münaqişənin sona çatması və yaşayış məntəqələrinin bərpası təhlükəsizlik və əməkdaşlıq üçün yeni imkanlar açıb. Bu kontekstdə Azərbaycan və Ermənistan arasında başladılmış normallaşma prosesi regional inteqrasiya və qarşılıqlı faydalı əməkdaşlıq üçün möhkəm zəmin yaradır. Bu proses sülhün möhkəmləndirilməsi və iqtisadi əlaqələrin inkişafı üçün mühüm mərhələdir”, – C.Bayramov bildirib.
