İran nümayəndə heyəti ABŞ ilə mümkün razılaşmanı müzakirə etmək məqsədilə Qətərin paytaxtı Dohaya səfər edib.
Cagdas.az “Reuters” agentliyinə istinadən xəbər verir ki, məsləhətləşmələr zamanı əsas diqqət Hörmüz boğazı ətrafındakı regional gərginliyə və İranın yüksək dərəcədə zənginləşdirilmiş uran ehtiyatlarına yönələcək. Səfərin əsas məqsədi tərəflər arasındakı münaqişəyə son qoymaq yollarını tapmaqdır. Bu məqsədlə, İranın baş danışıqçısı Məhəmməd Bağır Qalibaf və xarici işlər naziri Abbas Əraqçinin də daxil olduğu yüksək səviyyəli heyət Qətərin Baş naziri və xarici işlər naziri Şeyx Məhəmməd bin Əbdürrəhman Əl-Sani ilə bir araya gəlib.
Məlumata görə, müzakirələrin iqtisadi tərəfi də olduqca əhəmiyyətlidir. Belə ki, nümayəndə heyətinin tərkibində İran Mərkəzi Bankının sədri də Dohaya yollanıb. Onun yekun razılaşmanın bir hissəsi olaraq, İranın xaricdəki dondurulmuş aktivlərinin sərbəst buraxılması ilə bağlı müzakirələrdə iştirakı gözlənilir.(sfera.az)
