ABŞ Dövlət Departamenti Yaxın Şərqdə artan təhlükəsizlik risklərini əsas gətirərək bölgədəki bir sıra ölkələr üzrə vətəndaşlarına xəbərdarlıq edib.
Çağdaş.Az xəbər verir ki, ABŞ vətəndaşlarına həmin ölkələrdəki vəziyyəti yaxından izləmələri və zərurət yarandıqda ölkələri tərk etmələri tövsiyə olunub.
Xəbərdə qeyd olunur ki, xəbərdarlıq siyahısına ümumilikdə 14 ölkə daxil edilib. Bunlar arasında Türkiyənin sərhəd qonşuları olan İraq və Suriya da yer alır. Siyahıda həmçinin İran, İordaniya, Livan, İsrail, Fələstin əraziləri, Bəhreyn, Küveyt, Oman, Qətər, Səudiyyə Ərəbistanı, Birləşmiş Ərəb Əmirlikləri və Yəmən də göstərilib.
ABŞ rəsmiləri bildiriblər ki, bölgədəki hərbi və siyasi gərginliyin artması təhlükəsizlik risklərini yüksəldib. Bu səbəbdən vətəndaşlara səyahət planlarını yenidən nəzərdən keçirmək və rəsmi qurumların açıqlamalarını izləmək tövsiyə olunub.
ABŞ administrasiyası həmin ölkələrdə olan vətəndaşlarını təhlükəsizlik tədbirlərinə əməl etməyə, mümkün təxliyə variantlarını nəzərdən keçirməyə və diplomatik nümayəndəliklərlə əlaqədə olmağa çağırıb.
Qeyd edək ki, bu xəbərdarlıq Türkiyəyə şamil edilmir. Bununla belə, ABŞ daha əvvəl Türkiyənin bəzi cənub-şərq bölgələri ilə bağlı ayrıca səyahət xəbərdarlıqları yayımlamışdı.
