İspaniyanın cənubundakı Əndəlüs muxtar bölgəsində baş verən meşə yanğını nəticəsində azı 11 nəfər həyatını itirib, 19 nəfər isə itkin düşüb.
Çağdaş.Az xəbər verir ki, Əndəlüs hökumətinin rəhbəri Xuan Manuel Moreno Bonilya Cadena Cope radiosuna açıqlamasında hazırda 11 nəfərin ölümünün təsdiqləndiyini, ölənlərin sayının 12-yə yüksəlməsinin də mümkün olduğunu bildirib.
Məlumata görə, yanğın cümə axşamı günortadan sonra Almeriya şəhəri yaxınlığındakı Los Qalyardos qəsəbəsində başlayıb. Alov qısa müddətdə geniş əraziyə yayılaraq təxminən 3 150 hektar meşə və kənd təsərrüfatı sahəsini məhv edib.
Səlahiyyətli qurumlar bildiriblər ki, ölənlərdən bəzilərinin cəsədləri avtomobillərinin içərisində aşkar edilib. Bundan başqa, hadisə nəticəsində 8 nəfər yaralanıb, onlardan 4-nün vəziyyəti ağır qiymətləndirilir.
Əndəlüs Mülki Müdafiə naziri Antonio Sans bildirib ki, ölənlərin əksəriyyətinin, hətta hamısının əcnəbi olduğu ehtimal edilir. Onun sözlərinə görə, cəsədlərdən dördü sükanı sağ tərəfdə olan avtomobildə tapılıb ki, bu da onların Böyük Britaniya vətəndaşı ola biləcəyini göstərir. Həlak olanların şəxsiyyəti hələlik müəyyənləşdirilməyib.
Yanğının baş verdiyi ərazi turistlər arasında populyar olan Bedar kəndinin yaxınlığında yerləşir.
İlkin ehtimallara görə, meşə yanğını qurumuş bitki örtüyünün üzərinə düşən qırılmış elektrik xəttindən yaranıb.
Antonio Sans hadisəni “misli görünməmiş faciə” adlandırıb.
Yanğının söndürülməsi üçün gecə boyu təxminən 400 yanğınsöndürən və hərbçi cəlb olunub. Təhlükəsizlik məqsədilə çoxlu sayda sakin və turist bölgədən təxliyə edilib.
