Suriyanın Daxili İşlər Nazirliyi bildirib ki, Fransa Prezidenti Emmanuel Makronun Dəməşqə səfəri zamanı paytaxtda törədilən partlayışların arxasında İŞİD terror təşkilatı dayanıb.
Çağdaş.Az xəbər verir ki, Dəməşq vilayəti üzrə Daxili İşlər Nazirliyinin rəhbəri general Əhməd əl-Dəlati dövlət televiziyası “Al Ikhbariya”ya açıqlamasında bildirib ki, iyulun 7-də paytaxtın mərkəzində baş verən partlayışlarla bağlı aparılan ilkin araşdırma saxlanılan şəxslərin İŞİD terror təşkilatı ilə əlaqəli olduğunu üzə çıxarıb.
Onun sözlərinə görə, təhlükəsizlik qüvvələri terrorçulardan birini izlədikdən sonra şəhərin müxtəlif bölgələrində və ətraf ərazilərdə xüsusi əməliyyatlar keçirib. Nəticədə partlayışları təşkil edən hücrənin bütün üzvləri saxlanılıb. Onların dəqiq sayı açıqlanmayıb.
General əl-Dəlati vurğulayıb ki, Suriyada sabitliyi pozmağa və müharibədən sonrakı bərpa prosesinə mane olmağa çalışan hər kəsə qarşı qətiyyətli tədbirlər görüləcək.
Suriyanın Daxili İşlər Nazirliyinin məlumatına görə, Dəməşqin mərkəzində baş verən partlayışlar nəticəsində 1 nəfər həlak olub, 30-dan çox insan, o cümlədən 4 polis əməkdaşı yaralanıb. Yaralananlar arasında turizm nazirinin müavini Fərəc əl-Qaşquş da var. O, ayağından xəsarət alaraq xəstəxanaya yerləşdirilib.
Məlumata əsasən, partlayışlar təhlükəsizlik qüvvələrinin partlayıcı qurğuları zərərsizləşdirməyə çalışdığı vaxt baş verib. Bombalardan biri zibil qutusuna, digəri isə park edilmiş avtomobilə yerləşdirilmişdi.
Hadisə Fransa Prezidenti Emmanuel Makronun Suriyaya səfəri zamanı qaldığı “Four Seasons” otelinin yaxınlığında baş verib. Lakin “Al Hadath” telekanalının məlumatına görə, Makronun korteji partlayışdan təxminən 15 dəqiqə əvvəl ərazini tərk edib. Hadisə nəticəsində Fransa prezidenti və onu müşayiət edən nümayəndə heyətindən xəsarət alan olmayıb.
