Pəri bacaları, mağara otelləri, yeraltı şəhərləri və günəşin doğuşu ilə başlayan məşhur hava şarı turları ilə dünya miqyasında tanınan Türkiyənin Kapadokiya bölgəsi 2025-ci ildə 4,5 milyondan çox turist qəbul edərək ölkənin aparıcı mədəni turizm istiqamətlərindən biri kimi mövqeyini daha da möhkəmləndirib.
Qeyri-adi təbiət mənzərələri ilə dünyanın müxtəlif ölkələrindən gələn turistləri valeh edən Kapadokiya, eyni zamanda zəngin və unikal təcrübələr təqdim edən turizm məkanı kimi seçilib. Bu təcrübələr arasında bölgənin möhtəşəm vadilərini və özünəməxsus landşaftını kəşf etməyin ən populyar yollarından biri də at gəzintiləri olub.
Tarixən “gözəl atlar ölkəsi” kimi tanınan Kapadokiya öz zəngin atçılıq irsini bir daha nümayiş etdirərək regionun ən çox maraq doğuran tədbirlərindən birinə ev sahibliyi edib. Dünyanın müxtəlif ölkələrindən qonaqları bir araya gətirən II Kapadokiya At və Atçılıq Mədəniyyəti Festivalı 2026-cı il 3–5 iyul tarixlərində Göreme Festival Məkanında uğurla keçirilib.
“Gözəl atlar ölkəsi” kimi tanınan Kapadokiya insanlarla atlar arasındakı qədim və xüsusi bağın qeyd olunduğu festival üçün unikal məkan rolunu oynayıb. Üç gün davam edən festival çərçivəsində ziyarətçilərə Türkiyə və müxtəlif ölkələrdən gələn iştirakçıların təqdimatında ənənəvi və müasir at şouları nümayiş etdirilib. Proqram çərçivəsində atüstü oxatma yarışları, atçılıq nümayişləri və ənənəvi at yarışları böyük maraqla qarşılanıb.
Festival yalnız yarış və nümayiş proqramları ilə məhdudlaşmayıb. Tədbir iştirakçıları sərgilər, məruzələr və panel müzakirələri vasitəsilə müxtəlif sivilizasiyalarda at mədəniyyətinin tarixi və inkişaf yolu ilə yaxından tanış olmaq imkanı əldə ediblər. Kapadokiyanın füsunkar təbiəti fonunda təşkil olunan konsertlər və canlı çıxışlar isə festivalın atmosferinə xüsusi rəng qataraq, qonaqlara unudulmaz anlar yaşadıb.
Proqram çərçivəsində uşaqlar üçün əyləncə zonaları, ziyarətçilər üçün bələdçili at gəzintiləri, cirit kimi ənənəvi atçılıq nümayişləri və at gözəllik müsabiqələri də təşkil olunub. Bu müxtəlif tədbirlər festivalın məzmununu daha da zənginləşdirib və hər yaşdan iştirakçı üçün maraqlı təcrübələr təqdim edib.
Festival iştirakçıları, həmçinin, Michelin GUIDE tərəfindən beynəlxalq səviyyədə tanınan Nevşehir mətbəxinin özünəməxsus ləzzətlərini dadmaq imkanı əldə ediblər. Mədəniyyət, tarix, qastronomiya və möhtəşəm təbiət mənzərələrinin vəhdəti qonaqlara regionun autentik ruhunu hiss etdirməyə şərait yaradıb.
Atçılıq ənənələrini, zəngin mədəni irsi, yerli mətbəxi və Kapadokiyanın bənzərsiz təbiətini bir araya gətirən II Kapadokiya At və Atçılıq Mədəniyyəti Festivalı Türkiyənin qəlbində keçirilən ən yaddaqalan mədəni tədbirlərdən biri kimi yadda qalıb.
Kapadokiya: tarix, təbiət və qastronomiyanın vəhdəti
Kəşf edin: Kapadokiyanın zəngin tarixi irsi qaya məbədləri, qədim mağara yaşayış məskənləri və möhtəşəm yeraltı şəhərləri ilə ziyarətçilərə unikal təcrübə təqdim edir. Bu tarixi sərvətlər arasında UNESCO Dünya İrsi siyahısına daxil edilmiş Göreme Açıq Hava Muzeyi xüsusi maraq doğurur.
Yaşayın: Bölgənin bənzərsiz təbiətini kəşf etmək istəyən qonaqlar yürüş və velosiped marşrutlarından, mədəniyyət emalatxanalarından və Kapadokiyanın simvoluna çevrilmiş pəri bacalarını səmadan seyr etməyə imkan verən məşhur hava şarı turlarından yararlana bilərlər.
Qonaqlayın: Kapadokiyanın dəbdəbəli mağara otelləri tarixi atmosferi yüksək səviyyəli xidmət, müasir sağlamlıq və istirahət imkanları, həmçinin maksimum komfortla birləşdirərək qonaqlara unudulmaz istirahət təcrübəsi təqdim edir.
Dadın: Bölgəyə səfər edənlər Michelin Guide-a daxil edilmiş restoranlarda Kapadokiyanın zəngin mətbəx ənənələrini kəşf edə, mükafatlı restoranlarda təqdim olunan yerli təamların dadına baxa və əsrlər boyu formalaşmış şərabçılıq ənənələrinin məhsulu olan özünəməxsus yerli şərabları dada bilərlər.
