Paltaryuyan maşınların idarəetmə panelində onlarla işarə və proqram olsa da, bir çox istifadəçi onların əksəriyyətinin nə üçün nəzərdə tutulduğunu bilmir və daim eyni rejimdən istifadə edir. Halbuki düzgün proqram seçimi paltarları qorumaqla yanaşı, su və elektrik sərfiyyatını azalda, həmçinin cihazın ömrünü uzada bilər.
Cagdas.az xəbər verir ki, paltaryuyan maşınlarda olan hər bir işarə müəyyən parça növü və ya yuma rejimini ifadə edir.
Bununla belə, bəzi simvolların mənası istehsalçıdan və modeldən asılı olaraq dəyişə bilər.
Məsələn, bəzi modellərdə kəpənək işarəsi zərif parçalar üçün nəzərdə tutulan proqramı, spiral isə sıxma rejimini göstərir.
Mütəxəssislər bildirirlər ki, uyğun olmayan proqramın seçilməsi arzuolunmaz nəticələrə səbəb ola bilər. Zərif parçalar yüksək sürətli sıxma nəticəsində zədələnə, yun geyimlər kiçilə, çox çirkli paltarlar isə qısa proqramda tam təmizlənməyə bilər.
Eyni zamanda ehtiyac olmadığı halda daim yüksək temperaturdan istifadə etmək daha çox enerji sərfiyyatına və bəzi parçaların daha tez köhnəlməsinə səbəb ola bilər.
Kəpənək işarəsi nə deməkdir?
Paltaryuyan maşınlarda ən çox sual doğuran simvollardan biri kəpənək işarəsidir. Bir çox istehsalçı bu işarədən zərif parçalar üçün nəzərdə tutulmuş proqramı göstərmək məqsədilə istifadə edir.
Bu rejim ipək, krujeva, atlas, nazik və asanlıqla zədələnən digər materiallar üçün nəzərdə tutulub.
Belə proqram zamanı baraban daha yavaş və yumşaq hərəkət edir, suyun temperaturu aşağı saxlanılır, sıxma sürəti isə azaldılır və ya məhdudlaşdırılır. Bununla parça liflərinə düşən mexaniki yük minimuma endirilir.
Bəzi modellərdə eyni rejim kəpənək əvəzinə lələk, don işarəsi və ya “Delicate” sözü ilə göstərilə bilər.
Spiral işarəsi nə üçündür?
Spiral paltaryuyan maşınlarda ən geniş yayılmış işarələrdən biridir və adətən sıxma rejimini bildirir.
Bu funksiya paltardakı suyun mümkün qədər çox hissəsinin çıxarılmasına xidmət edir və nəticədə geyimlərin quruma müddəti azalır.
Əksər maşınlarda sıxma sürətini tənzimləmək mümkündür. Modeldən asılı olaraq bu göstərici dəqiqədə təxminən 400-dən 1600 dövrə qədər dəyişə bilər.
Yüksək sürət dəsmal, yataq dəsti və pambıq məhsullar üçün daha münasib hesab olunur. Köynək, bluz, viskoza, ipək və yun paltarlar üçün isə aşağı sürətli sıxma tövsiyə edilir. Çünki yüksək sürət belə geyimlərin həddindən artıq qırışmasına, formasının dəyişməsinə və liflərinin zədələnməsinə səbəb ola bilər.
Pambıq çiçəyi işarəsi nə deməkdir?
Pambıq çiçəyi işarəsi pambıq və davamlı parçalar üçün nəzərdə tutulmuş proqramı göstərir.
Bu rejim dəsmal, yataq dəsti, köynək, futbolka və yüksək temperaturla intensiv sıxmaya davamlı digər pambıq məhsullar üçün istifadə edilə bilər.
Paltarın çirklənmə səviyyəsinə və etiketdəki göstərişlərə əsasən temperatur 20-90 dərəcə arasında seçilə bilər.
Mütəxəssislər çox yüksək temperaturdan yalnız həqiqətən ehtiyac olduqda istifadə etməyi məsləhət görürlər. Müasir yuyucu vasitələrin daha aşağı temperaturda da effektiv olduğu bildirilir.
Dəsmal, yataq dəsti və daha ciddi təmizləmə tələb edən əşyaların 60 dərəcədə yuyulması uyğun hesab edilə bilər. Gündəlik geyimlər çox çirkli deyilsə, onları 30-40 dərəcədə də effektiv şəkildə yumaq mümkündür.
Su qabında əl işarəsi nə deməkdir?
Su dolu qabın içərisində əl təsviri çox zərif yuma rejimini göstərir. Bu proqram mümkün qədər əl ilə yuma hərəkətlərini təqlid edir.
Rejim adi yuma proqramına davam gətirməyən həssas materiallardan hazırlanmış geyimlər üçün nəzərdə tutulub. Baraban yavaş və fasiləli şəkildə hərəkət edir, suyun temperaturu aşağı olur, sıxma isə məhdudlaşdırılır və ya ümumiyyətlə həyata keçirilmir.
Lakin mütəxəssislər vacib bir məqama diqqət çəkirlər. Paltaryuyan maşındakı “əl ilə yuma” proqramı ilə geyimin etiketində olan əl ilə yuma işarəsini qarışdırmaq olmaz.
Əgər geyimin etiketində yalnız əl ilə yuma göstərilibsə, istehsalçı həmin əşyanın paltaryuyan maşına qoyulmamasını tövsiyə edir. Bu halda maşında xüsusi “əl ilə yuma” proqramının olması belə həmin göstərişi dəyişmir.
Mütəxəssislər paltar yuyarkən həm cihazın proqramlarına, həm də geyimin üzərindəki qulluq etiketinə diqqət yetirməyi məsləhət görürlər. Düzgün rejim seçimi paltarların daha uzun müddət formasını və görünüşünü qorumasına, eyni zamanda lazımsız enerji və su sərfiyyatının qarşısının alınmasına kömək edir./lent
