Tramp administrasiyası 30-a yaxın peşəkar diplomatı geri çağırıb.
“Öncə Amerika” siyasətini tam dəstəkləyən diplomatlardan ibarət komanda formalaşdırmaq istəyən ABŞ Prezidenti Donald Trampın administrasiyası, aralarında səfirlərin də olduğu təxminən 30 peşəkar diplomatı xidmət etdikləri ölkələrdən geri çağırıb.
Cagdas.az xəbər verir ki, ABŞ Dövlət Departamentindən iki rəsmi şəxsin verdiyi məlumata görə, azı 29 ölkədə fəaliyyət göstərən yüksək rütbəli diplomatlara yanvar ayında səlahiyyət müddətlərinin başa çatacağı bildirilib.
Rəsmilər qeyd ediblər ki, geri çağırılan diplomatların hamısı sabiq prezident Co Baydenin dövründə vəzifəyə başlayıb. Eyni zamanda vurğulanıb ki, bu şəxslər Trampın ikinci prezidentlik müddətinin ilk aylarında həyata keçirilən vəzifə dəyişikliklərindən birbaşa təsirlənməyiblər.
Associated Press agentliyinə danışan mənbələr bildiriblər ki, geri çağırılan diplomatlar istədikləri təqdirdə karyeralarını Vaşinqtonda başqa vəzifələrdə davam etdirə bilərlər.
ABŞ Dövlət Departamenti məsələ ilə bağlı yaydığı açıqlamada kadr dəyişikliklərinin “hər administrasiya dövründə baş verən standart proses” olduğunu vurğulayıb. Açıqlamada səfirlərin “prezidentin şəxsi nümayəndələri” olduğu qeyd edilərək, prezidentin “Öncə Amerika” siyasətini irəli aparacaq şəxslərlə işləməsinin təbii haqqı olduğu bildirilib.
Digər tərəfdən, vəzifədən azad olunmaların ən çox Afrika regionunda qeydə alındığı, burada 13 səfirin geri çağırılacağı qeyd olunur. Afrikanı 6 səfir dəyişikliyi ilə Asiya, 4 səfirin geri çağırılması ilə isə Avropa izləyir.
ABŞ-də səfirlər prezidentin qərarı əsasında fəaliyyət göstərir və adətən üç-dörd il müddətinə vəzifədə qalırlar
