Araq uzun illərdir həm gündəlik məclislərin, həm də mübahisələrin mövzusudur. Bir tərəf onu zərərli vərdiş kimi qiymətləndirir, digər tərəf isə müəyyən hallarda faydalı ola biləcəyini iddia edir. Xüsusilə də az miqdarda araq qəbulunun orqanizmə təsiri tez-tez müzakirə olunur.
Cagdas.az xəbər verir ki, Azərbaycan Tibb Universitetinin müəllimi, tanınmış həkim Rəşid Mahmudov dəfələrlə bildirib ki, araqdan məhdud miqdarda istifadə bəzi hallarda qan dövranını sürətləndirir və damarların genişlənməsinə kömək edir. Onun sözlərinə görə, xüsusilə soyuq havalarda və ya güclü stres zamanı çox az miqdarda spirtli içki müvəqqəti rahatlıq hissi yaradır. Bununla yanaşı, antiseptik xüsusiyyətlərinə görə araq tibbdə başqa məqsədlərlə istifadə olunur.
Həkim Əlif Əhmədov isə saytımıza açıqlamasında bildirib ki, bu “fayda” yalnız çox məhdud və nəzarətli istifadəyə aiddir. Həddindən artıq və ya müntəzəm spirt qəbulu qaraciyər, ürək-damar sistemi və sinir sistemi üçün ciddi risklər yaradır: “Araqdan müalicə vasitəsi kimi istifadə etmək doğru deyil. Arağın sayəsində müvəqqəti rahatlıq axtaran insanlar bolməlidirlər ki, onları daimi xəstəlik təqib edir”.(metbuat.az)
