Arıqlamaq istəyənlərin çoxu bahalı pəhrizlərə, müxtəlif əlavələrə və ya mürəkkəb proqramlara üz tutur. Halbuki mətbəxinizdə hər gün istifadə etdiyiniz sadə bir meyvə bu yolda sizə dəstək ola bilər. Söhbət limondan gedir.
Çağdaş.Az xəbər verir ki, əsrlərdir həm sağlamlıq, həm də gözəllik məqsədilə istifadə olunan limon təkcə yeməklərə dad qatmaqla kifayətlənmir. Mütəxəssislərin fikrincə, düzgün istifadə edildikdə maddələr mübadiləsinin sürətlənməsinə və orqanizmin daha aktiv işləməsinə də kömək edə bilər.
C vitamini ilə zəngin olan limon güclü antioksidant təsirə malikdir. O, bədəndə toplanan sərbəst radikallarla mübarizə apararaq hüceyrələri qoruyur, immun sistemini gücləndirir və orqanizmin özünü daha enerjili hiss etməsinə şərait yaradır.
Limonun diqqət çəkən xüsusiyyətlərindən biri də həzm sisteminə göstərdiyi müsbət təsirdir. Qaraciyərin fəaliyyətini dəstəkləyən bu meyvə qidaların daha rahat həzm olunmasına kömək edir. Bunun nəticəsində şişkinlik hissi azalır, bədən özünü daha yüngül hiss edir.
Bundan başqa, limonun tərkibindəki faydalı maddələr orqanizmdə maye balansının qorunmasına dəstək olur. Bu isə xüsusilə sellülit görünüşünün azalmasına və dərinin daha sağlam görünməsinə kömək edə bilər.
Mütəxəssislər günə bir stəkan ilıq suya yarım limonun şirəsini sıxaraq başlamağı tövsiyə edirlər. Bu sadə vərdiş həm orqanizmi oyadır, həm də gün ərzində maddələr mübadiləsinin daha aktiv işləməsinə şərait yarada bilər.
Əlbəttə, təkcə limonun möcüzə yaradacağını düşünmək düzgün deyil. Lakin balanslı qidalanma və aktiv həyat tərzi ilə birlikdə istifadə edildikdə bu kiçik sarı meyvə artıq çəkilərlə mübarizədə faydalı köməkçiyə çevrilə bilər./yenisabah
