İspaniyadakı Barselona Qlobal Sağlamlıq İnstitutu (ISGlobal) tərəfindən aparılan yeni araşdırma yemək vaxtlarının bədən çəkisinə təsiri ilə bağlı maraqlı nəticələr ortaya qoyub.
Cagdas.az xəbər verir ki, tədqiqatçılar 40-65 yaş arası 7074 nəfərin qidalanma və çəki göstəricilərini təhlil edərək müəyyən ediblər ki, daha erkən səhər və axşam yeməyi, həmçinin qəlyanaltılardan uzaq durmaq beş il sonra daha aşağı bədən kütlə indeksi ilə əlaqələndirilir. Araşdırmaya görə, yemək vaxtlarının insanın daxili bioloji saatı ilə uyğunluğu mühüm rol oynayır.
Bu ritmlər orqanizmin gün ərzində nə vaxt aktiv, nə vaxt isə istirahətdə olmalı olduğunu tənzimləyir. “ISGlobal”ın epidemioloqu Luciana Pons-Muzzo bildirib ki, gecə oruc müddətinin uzadılması və bunun erkən səhər yeməyi ilə birləşdirilməsi sağlam çəkini qorumağa kömək edə bilər. Onun sözlərinə görə, günün əvvəlində qida qəbul etmək kalori istifadəsini daha effektiv edir və iştahanın tənzimlənməsini yaxşılaşdırır.
Tədqiqatçılar müxtəlif statistik metodlardan istifadə edərək müəyyən ediblər ki, səhər yeməyini gec yemək və ya tez-tez yemək bədən kütlə indeksinin artması ilə əlaqəlidir. Əksinə, gecə ərzində daha uzun fasilə, yəni uzunmüddətli oruc daha aşağı indekslə əlaqələndirilir. Araşdırma çərçivəsində aparılan klaster təhlili isə maraqlı bir alt qrupu üzə çıxarıb.
Yalnız kişilərdən ibarət bu qrupda iştirakçılar ilk yeməklərini saat 14:00-dan sonra yeyir, orta hesabla 17 saat oruc tutur və daha çox spirtli içki, siqaret istifadəsinə meylli olurdular. “ISGlobal” epidemioloqu Kamil Lassale bu qrupda aralıq orucun bədən çəkisinə nəzərəçarpacaq təsir göstərmədiyini qeyd edib. O əlavə edib ki, digər müdaxilə tədqiqatları da bu metodun uzunmüddətli perspektivdə kalori məhdudiyyətindən daha effektiv olmadığını göstərir.
Bildirilir ki, əgər insanlar çəki nəzarəti üçün səhər yeməyini buraxırsa, bunun əvəzinə şam yeməyini daha erkən saatlara çəkmək və səhər yeməyini bərpa etmək daha faydalı ola bilər. Tədqiqatçılara görə, insulin ifrazı və yağ yığılması kimi proseslər də məhz bu bioloji ritmlərlə sıx bağlıdır. Bununla yanaşı, kifayət qədər yuxu da sağlam çəki üçün vacib amillərdən biri kimi qeyd olunur.(sfera.az)
