Əcnəbilərin Azərbaycanda müvəqqəti olma müddətinin uzadılması ilə bağlı prosedurlar rəqəmsallaşdırılır.
Cagdas.az xəbər verir ki, bununla bağlı dəyişikliklər Milli Məclisin bugünkü iclasında müzakirəyə çıxarılan Miqrasiya Məcəlləsi, “Yaşayış yeri və olduğu yer üzrə qeydiyyat haqqında” və “Dövlət rüsumu haqqında” qanunlara təklif edilən düzəlişlərdə əksini tapıb.
Layihəyə əsasən, Miqrasiya Məcəlləsində nəzərdə tutulan dəyişikliklər müvəqqəti olma müddətinin uzadılması barədə qərarların kağız daşıyıcıda deyil, elektron sənəd formasında rəsmiləşdirilməsini nəzərdə tutur. Dövlət rüsumu ödənildikdən sonra qərar müraciət edənin Elektron Hökumət İnformasiya Sistemindəki elektron kabinetinə yerləşdiriləcək və eyni zamanda onun elektron poçt ünvanına göndəriləcək. Dəyişikliklə qərarın məzmununun təsdiqlənməsi, elektron imza ilə rəsmiləşdirilməsi və elektron xidmətlərin hüquqi əsaslarının daha dəqiq müəyyənləşdirilməsi də təmin olunur.
Eyni zamanda, Miqrasiya Məcəlləsinin 43-cü maddəsinə edilən dəyişikliklə müvəqqəti olma müddətinin uzadılmasından imtina üçün yeni əsas müəyyən edilir. Belə ki, Məcəllənin 41.1-ci maddəsində göstərilən sənədlərdən hər hansı birinin və ya bir neçəsinin təqdim edilməməsi də imtina səbəbi hesab olunacaq.
“Yaşayış yeri və olduğu yer üzrə qeydiyyat haqqında” qanuna terminoloji xarakterli düzəliş təklif edilir. “Dövlət rüsumu haqqında” qanuna edilən dəyişiklik isə müvəqqəti olma müddətinin uzadılması barədə qərarın təkrar verilməsinə görə dövlət rüsumunun tutulmamasını nəzərdə tutur.
Layihədə keçid müddəası da yer alıb. Həmin müddəaya əsasən, qanun qüvvəyə minənədək verilmiş müvəqqəti olma müddətinin uzadılması barədə qərarlar onlarda göstərilən müddət başa çatanadək hüquqi qüvvəsini saxlayacaq. Bu qərarlar itirildikdə, məhv olduqda, yararsız vəziyyətə düşdükdə və ya əcnəbinin, yaxud vətəndaşlığı olmayan şəxsin şəxsiyyətini təsdiq edən sənəddəki məlumatlar dəyişdikdə, onlar elektron formada yenidən tərtib ediləcək. Sənəd Elektron Hökumət İnformasiya Sistemində müraciət edənin elektron kabinetinə yerləşdiriləcək və elektron poçt ünvanına göndəriləcək. Bu hallarda qərarın yenidən rəsmiləşdirilməsi üçün dövlət rüsumu ödənilməyəcək.
Qeyd olunub ki, təklif edilən dəyişikliklər dövlət xidmətlərinin rəqəmsallaşdırılmasına, sənəd dövriyyəsinin sadələşdirilməsinə, elektron müraciət mexanizmlərinin genişləndirilməsinə, inzibati prosedurların operativliyinin artırılmasına və qanunvericiliyin elektron idarəetmə prinsiplərinə uyğunlaşdırılmasına xidmət edir.
Məsələ səsə qoyularaq üçüncü oxunuşda qəbul edilib.
