Son dövrlərdə sağlam qidalanma və düzgün həyat tərzi ilə bağlı müzakirələrdə probiotiklər xüsusi yer tutur.
Cagdas.az xəbər verir ki, “Faydalı bakteriyalar” adı ilə tanınan bu məhsullar həm təbii qidalarda, həm də qida əlavələri formasında geniş istifadə olunur. Probiotiklərin faydaları ilə yanaşı, mümkün risklərinə də diqqət edilməlidir. Probiotiklər əsasən bağırsaq mikroflorasını tənzimləyən canlı mikroorqanizmlərdir. Onlara qatıq, kefir, ayran, fermentləşdirilmiş tərəvəzlər və aptek məhsulları vasitəsilə rast gəlinir.
Bu bakteriyalar həzm sisteminin fəaliyyətinə müsbət təsir göstərə bilər. Probiotiklərin müntəzəm qəbulu bağırsaq fəaliyyətinin yaxşılaşmasına, köp və həzm narahatlıqlarının azalmasına kömək edə bilər. Bundan başqa, bağırsaq mikrobiotasının immun sistemlə sıx əlaqəsi səbəbindən probiotiklərin bədənin müdafiə mexanizmlərinə dəstək verdiyi bildirilir. Xüsusilə antibiotik müalicəsindən sonra bağırsaq tarazlığının bərpasında probiotiklərin rolu vurğulanır.
Probiotiklərin psixoloji vəziyyətlə də əlaqəli ola biləcəyi qeyd olunur. Mütəxəssislər “bağırsaq-beyin əlaqəsi”nin stress və ümumi ruh halına təsir göstərə biləcəyini bildirirlər. Bununla yanaşı, probiotiklərin nəzarətsiz istifadəsinin arzuolunmaz nəticələr doğura biləcəyini də istisna edilmir. Həddindən artıq qəbul bəzi hallarda qarında köp, narahatlıq və həzm pozğunluqları ilə müşayiət oluna bilər. Xüsusilə immun sistemi zəif olan şəxslər üçün probiotiklərin risk yarada biləcəyi qeyd olunur. Sosial mediada probiotiklərin bəzən şişirdilmiş şəkildə təqdim edilməsinə də diqqət edilir.
Onların arıqlama və ya bütün xəstəliklərə çarə kimi reklam olunmasının elmi əsaslara tam söykənmədiyi vurğulanır. Nəticə etibarilə, probiotiklər düzgün və məqsədyönlü istifadə edildikdə sağlamlıq üçün faydalı ola bilər. Lakin həkim və ya mütəxəssis məsləhəti olmadan qida əlavəsi formasında qəbul edilməsi tövsiyə edilmir. Balanslı qidalanma və məlumatlı seçim bu məhsullardan maksimum fayda əldə etməyin əsas yolu kimi göstərilir.(sfera.az)
