Jensen Huanq süni intellektin nəzarətdən çıxaraq bəşəriyyət üçün ekzistensial təhlükəyə çevriləcəyi ilə bağlı iddialara münasibət bildirib.
Çağdaş.Az-ın xəbərinə görə, Nvidia şirkətinin baş icraçı direktoru CBS News-a müsahibəsində deyib ki, süni intellektin 2030-cu ilə qədər dünyanın sonuna səbəb olacağı ehtimalı “0 faizdir”.
“2030-cu il dünyanın sonu olmayacaq. Bunun baş vermə ehtimalı sıfırdır”, – deyə Hanq bildirib.
Onun sözlərinə görə, bu cür xəbərdarlıqlar elmi əsaslara söykənmir və daha çox ictimaiyyətdə qorxu yaradan “qiyamət ssenariləri” xarakteri daşıyır.
Hanqın açıqlamaları texnologiya sektorunda süni intellektin riskləri ilə bağlı mövcud fikir ayrılığını bir daha üzə çıxarıb.
Dario Amodi başda olmaqla bəzi texnologiya rəhbərləri inkişaf etmiş süni intellekt modellərinin nəzarətdən çıxma riskinə qarşı daha güclü təhlükəsizlik tədbirləri və müstəqil sınaq mexanizmlərinin tətbiqini vacib hesab edirlər.
Eyni zamanda Sam Altman da daxil olmaqla bir sıra texnologiya liderləri süni intellektin potensial risklərinin ciddi qəbul edilməsinin vacibliyini vurğulayırlar.
Jensen Hanq isə süni intellekt sahəsində inkişaf tempinin ləngidilməsinin əleyhinə olduğunu bildirib.
Onun fikrincə, xüsusilə ABŞ-ın Çinlə texnologiya sahəsində rəqabətini nəzərə alaraq innovasiyaların sürətlə davam etdirilməsi vacibdir. Bununla yanaşı, Hanq qeyd edib ki, sürətli inkişaf təhlükəsizlik standartlarına məhəl qoyulmaması demək deyil.
Nvidia rəhbəri hesab edir ki, yeni və sərt tənzimləmələr qəbul etməkdənsə, mövcud qanunların effektiv icrası və şirkətlərin hazırladıqları süni intellekt sistemlərinə görə məsuliyyət daşıması daha düzgün yanaşmadır.
