Qız övladı böyütməyin valideynlərin beyin sağlamlığına müsbət təsir göstərdiyi məlum olub. Aparılan elmi araşdırmaya görə, qız uşağı olan valideynlərdə yaşlılıq dövründə demans və zehni zəifləmə riski daha aşağıdır. Çinin Hohai Universiteti alimləri tərəfindən aparılan tədqiqat çərçivəsində yüzlərlə yaşlı şəxsin yaddaş və düşünmə qabiliyyəti təhlil edilib. Araşdırmada iştirakçıların ailə strukturu, xüsusilə qız və oğlan övladlarının sayı nəzərə alınıb.
Cagdas.az-ın məlumatına görə Ahəng psixoloji inkişaf və dəstək ictimai birliyinin sədri, ailə uşaq psixoloqu Vüsalə Əmiraslanova Ölkə.az-a bildirib ki, qız və oğlan övladlarının əsas psixoloji fərqi ondan ibarətdir ki, oğlanlar ümumiyyətlə region olaraq Azərbaycanda daha azad, daha rahat böyüyürlər və onlara uşaqlıqdan demək olar ki, hər şey icazəlidir deyə daha sərbəst olurlar.:
“Amma bir müddətdən sonra valideynlər uşaqları üçün narahat olmağa başlayırlar. Əsasən də oğlanların böyümə prosesində valideynlər daha çox narahat olurlar və düşünürlər ki, onlar hər hansı neqativ bir hərəkət edərlərmi, yaxud da kiminsə işinə qarışarlarmı.
Məsələn, uşaqlara sataşarlarmı, məktəbdə dava düşərmi, yaxud da özlərini müdafiə edə bilərlərmi, yoxsa yox? Valideynlər daim oğlanları mübarizə və müharibə ruhunda böyüdürlər və buna görə də davamlı şəkildə narahat olurlar. Analar ayrı, atalar ayrı düşünür, amma qız övladı olan valideynlər isə daha rahat olurlar. Çünki düşünürlər ki, qız həmişə evdədir, həmişə gözümüzün qabağındadır, daha rahatdır. Pis olanda ağlayır, çətinliyə düşəndə fikrini bildirir.
Oğlanlar isə daha qapanıq olurlar və danışmırlar. Amma düşünürəm ki, burada qız-oğlan fərqi qoymadan ailə dəyərlərini daha üstün tutmaq lazımdır. Yəni ailə dəyərlərində qızlar anaları, oğlanlar isə ataları ilə daha çox ünsiyyətdə olurlar və hər ikisinə də emosional olaraq duyğular analardan ötürülür.
Bu münasibətlərə emosiyanın təsir etdiyini nəzərə alsaq, əsas aparıcı rol ananın üzərinə düşür. Ana uşaqları ilə daha çox danışanda, uşaqlar daha rahat və özgüvənli olurlar, münasibətləri də daha sağlam formalaşır.
Ən böyük problemlərdən biri isə ünsiyyət problemləri çərçivəsində valideynlərin manipulyasiyası, günahlandırma hissləri və müqayisə etmə davranışlarıdır. Bu, qızlarla bağlı olanda qızlar özlərini təsdiqləməyə çalışırlar, amma oğlanlarda təsdiq ehtiyacı daha çox olduğuna görə əksini sübut etməyə cəhd edirlər. Nəticədə isə bu hal beynin inkişafına və davamlı ünsiyyətə mane olur həm uşaqlarda, həm də böyüklərdə”.
Həmidə İbrahimova
