Ermənistanın müxalif “Ermənistan” (Hayastan) bloku ölkənin keçmiş Prezidenti Robert Köçəryanın parlament seçkilərindən sonra ölkədən qaçmağa cəhd etməsi barədə hökumətyönlü medianın yaydığı iddiaları rədd edib.
Cagdas.az bildirir ki, siyasi qüvvə eks-prezident ətrafında yaranan şayiələrə bəyanatla cavab verib.
Blokun rəsmi bəyanatında bu iddiaların tamamilə əsassız olduğu vurğulanıb:
“Son günlərdə bəzi dairələr Robert Köçəryanın Ermənistanı tərk etmək istədiyi, lakin buna icazə verilmədiyi barədə məlumatlar yayaraq gündəm yaratmağa çalışırlar. Hətta məsələni “qaçış” kimi qələmə verənlər də var. Xatırladırıq ki, söhbət hələ 2018-ci ildə Ermənistana qayıdarkən həbs olunacağını, cinayət təqibinə və siyasi təzyiqlərə məruz qalacağını dəqiq bilən, lakin buna baxmayaraq geri dönən şəxsdən gedir. Həbs təhlükəsinə rəğmən vaxtilə könüllü şəkildə ölkəyə gələn bir insanın bu gün ‘qaçmağa’ ehtiyacının olması absurddur”.
Qeyd edək ki, iyunun 14-də Robert Köçəryanın ofisi siyasətçinin şəxsi işləri ilə bağlı xaricə üçgünlük səfər edəcəyini açıqlamışdı. Lakin bir neçə saat sonra sabiq dövlət başçısının ölkədən çıxışına qadağa qoyulduğu məlum olub.
Məsələni böyüdən isə Baş nazir Nikol Paşinyanın ailəsinə məxsus “Ayqakan Jamanak” (Armenian Time) qəzetinin “Telegram” kanalında yayılan görüntülər olub. Həmin videoda Köçəryanın sərhəd-keçid məntəqəsinin qapalı zonasında yoxlanışdan keçdiyi əks olunub.
Ermənistan mətbuatı dərhal hərəkətə keçərək, yalnız Milli Təhlükəsizlik Xidmətinin (MTX) ixtiyarında ola biləcək bu məxfi kadrların hökumətyönlü qəzetin əlinə necə düşməsi ilə bağlı sorğu göndərib. Lakin MTX hələ də mövzu ilə bağlı susqunluğunu qoruyur. Digər tərəfdən, Köçəryanın ölkədən çıxışına qoyulan qadağanın hüquqi əsası da qaranlıq qalıb. Çünki siyasətçiyə qarşı yeni bir cinayət işi açılmayıb və istintaq orqanları tərəfindən hər hansı rəsmi bildiriş daxil olmayıb. Həmçinin onun 1 mart 2008-ci il hadisələri ilə bağlı keçmiş cinayət işi üzrə də heç bir hərəkət məhdudiyyəti yoxdur.
Müxalifət bu addımı hakimiyyətin siyasi təzyiq və qisas aləti kimi qiymətləndirir.(sfera.az)
