Avropa Birliyi (AB) qurumları 13 ildir davam edən müzakirələrdən sonra hava yolu sərnişinlərinin hüquqlarını genişləndirən yeni qaydalar üzərində razılığa gəliblər. Yeni tənzimləməyə əsasən, uçuşu 3 saatdan çox gecikən sərnişinlər məsafədən asılı olaraq 250 ilə 600 avro arasında təzminat ala biləcəklər.
Cagdas.az xarici mediaya istinadla xəbər verir ki, Avropa Parlamenti və AB Şurası tərəfindən rəsmən təsdiqləndikdən sonra qüvvəyə minəcək bu qərar çərçivəsində sərnişinlərin pulsuz əl baqajı hüququ qorunacaq və reyslərin ləğvi zamanı onlara əlavə təminatlar veriləcək. Şirkətlər sərnişinləri gecikmələr barədə 96 saat ərzində elektron qaydada məlumatlandırmalı və daxil olan təzminat müraciətlərinə ən geci 30 gün ərzində cavab verməli olacaqlar.
Bundan əlavə, gediş biletindən istifadə etməyən sərnişinlərin qayıdış reysinə buraxılmaması, yəni “no-show” təcrübəsi də qadağan edilir. Qiymət şəffaflığını artırmaq məqsədilə bilet alınarkən ilkin qiymətə əl baqajının da daxil ediləcəyi və ailələrin əlavə ödəniş etmədən təyyarədə yan-yana əyləşə biləcəyi bildirilir.
Sərnişinlərin hüquqlarını maksimum qoruyan bu tətbiqin qısa zamanda dünya miqyasında yayılacağı gözlənilir.(metbuat.az)
