ABŞ-da həkimlər tibb tarixində mühüm hadisələrdən birinə imza atıblar. Ana bətnində bağırsaqları qarın boşluğundan kənarda inkişaf edən körpə, hələ dünyaya gəlməmişdən əvvəl xüsusi cərrahi müdaxilə ilə əməliyyat olunub.
Cagdas.az xəbər verir ki, hadisə ABŞ-ın Hyuston şəhərində baş verib. İngiltərədən olan Maisi Sevic və Coş Frenç cütlüyü hamiləliyin 20-ci həftəsində keçirilən ultrasəs müayinəsi zamanı körpələrində nadir doğuş anomaliyasının olduğunu öyrəniblər.
Mütəxəssislər körpəyə kompleks qastroşizis diaqnozu qoyublar. Bu vəziyyətdə qarın divarı tam formalaşmadığı üçün bağırsaqlar bədənin xaricində inkişaf edir. Xəstəliyin ağır forması körpənin doğulduqdan sonra uzunmüddətli müalicəyə və bir neçə əməliyyata ehtiyac duymasına səbəb ola bilər.
Ailə Londonun aparıcı tibb mərkəzlərində aparılan qiymətləndirmələrdən sonra ABŞ-ın Hyuston şəhərində yerləşən Texas Children’s Hospital tərəfindən həyata keçirilən klinik araşdırmaya cəlb olunub.
Hamiləliyin 26-cı həftəsində gələcək ana əməliyyata alınıb. Fetal cərrah Maykl Belfortun rəhbərlik etdiyi tibbi komanda xüsusi üsulla ana bətninə daxil olaraq körpənin qarın boşluğundan kənarda olan bağırsaqlarını ehtiyatla yerinə yerləşdirib və qarın divarındakı açıq hissəni bərpa edib. Bu əməliyyat nəticəsində körpə ana bətnində bu üsulla müalicə olunan dünyada üçüncü, İngiltərədən isə ilk körpə olub. Əməliyyatdan sonra hamiləlik normal davam edib. Ana daha 14 həftə körpəni bətnində daşıyıb. Fevral ayında dünyaya gələn Theo adlı körpə doğuşdan sonra həkimlərin gözlədiyindən daha sürətli bərpa olunub. O, cəmi dörd gün sonra xəstəxanadan evə buraxılıb. Hazırda beş aylıq olan Theo-nun sağlamlıq vəziyyətinin yaxşı olduğu və ailəsi ilə birlikdə İngiltərəyə qayıtdığı bildirilib.
Mütəxəssislər qeyd edirlər ki, kompleks qastroşizis zamanı körpələr doğulduqdan sonra uzun müddət reanimasiyada qala, bir neçə əməliyyat keçirə və hətta ömürboyu xüsusi qidalanmaya ehtiyac duya bilərlər.
Əməliyyatı həyata keçirən həkimlər Theo-nun nəticələrinin olduqca ümidverici olduğunu vurğulayıblar. Alimlərin fikrincə, klinik araşdırmalar uğurlu nəticə verərsə, ana bətnində həyata keçirilən bu cür əməliyyatlar gələcəkdə doğuşdan əvvəl müalicə üsullarından birinə çevrilə bilər.
Theo-nun hekayəsi yalnız bir körpənin həyatının xilas edilməsi deyil, eyni zamanda doğuş qüsurlarının hələ ana bətnində aradan qaldırılması istiqamətində tibb elmi üçün böyük bir addım hesab olunur.(referans media)
