Apple şirkətində Stiv Cobsun vəfatından sonra baş direktor vəzifəsinə gələn Tim Kuk 15 illik rəhbərlikdən sonra vəzifəsini təhvil verməyə hazırlaşır.
Çağdaş.Az-ın verdiyi məlumata görə, Kuk baş direktor postunu şirkətin aparat təminatı üzrə rəhbəri Con Ternusa verəcək.
“Financial Times” Tim Kuk dövründə “Apple”ın əldə etdiyi nəticələrlə bağlı geniş hesabat hazırlayıb.
Hesabata əsasən, Kukun rəhbərliyi illərində Apple səhmlərinin dəyəri 2000 faizdən çox artıb. Şirkətin bazar kapitalizasiyası isə son birja göstəricilərinə əsasən 4,67 trilyon dollara çatıb.
Apple-ın “S&P 500” indeksindəki payı da 3 faizdən 7 faizdən yuxarı səviyyəyə yüksəlib.
Tim Kukun rəhbərliyi dövründə Apple dünya bazarında təxminən 3,1 milyard ədəd iPhone satıb. Bu rəqəm dünya əhalisinin təxminən yarısına uyğun gəlir.
Kukun ən mühüm strateji addımlarından biri “Apple”ın prosessor istehsalında müstəqil xəttə keçməsi olub.
Şirkət əvvəllər üçüncü tərəf istehsalçılarına, o cümlədən Intelə bağlı olduğu halda, öz çiplərini hazırlamağa başlayıb. Bu addım nəticəsində Apple-ın mənfəət marjasının təxminən 40 faizdən 50 faizə yüksəldiyi bildirilir.
Tim Kuk dövründə MacBook və iPad xətti əsasən qorunsa da, şirkət bir neçə yeni məhsul təqdim edib.
Bunlara:
Apple Watch
AirPods
HomePod
Apple Vision Pro
AirTag
daxildir.
Kukun rəhbərliyi dövründə Apple-ın xidmət ekosistemi də sürətlə böyüyüb.
Apple Pay, iCloud, App Store və Apple Music kimi xidmətlərin ümumi abunəçi sayı 1,5 milyarda çatıb.
Məlumata görə, Tim Kuk Apple şirkətindən 15 illik rəhbərliyi ərzində ümumilikdə 880 milyon dollar ödəniş alıb.
Forbesin qiymətləndirməsinə əsasən, Tim Kukun şəxsi sərvəti hazırda təxminən 3 milyard dollar təşkil edir.
