Ukrayna Prezidenti Volodimir Zelenski sabah ölkəsini təmsil edən nümayəndə heyətinin ABŞ tərəfi ilə sülh danışıqları aparmaq üçün görüşəcəyini açıqlayıb.
Cagdas.az-ın Belçika mətbuatına istinadən məlumatına görə, Zelenski Brüsseldə keçirilən Avropa İttifaqı sammiti çərçivəsində jurnalistlərə verdiyi açıqlamada, Ukraynada müharibəyə son qoymaq məqsədilə ABŞ ilə danışıqların sabah yenidən başlayacağını bildirib.
Prezidentin sözlərinə görə, Ukrayna nümayəndə heyəti cümə və şənbə günləri ABŞ-də olacaq:
“Heyətimiz artıq yoldadır. Amerikalı nümayəndələr onları gözləyir”.
Zelenski əlavə edib ki, görüşlərdə Avropa ölkələrinin liderləri də iştirak edə bilər.
Xatırladaq ki, ötən həftə Berlində keçirilən görüşlərdə ABŞ Prezidenti Donald Trampın sülh planı ilə bağlı Ukrayna tərəfinin Vaşinqtona təqdim etdiyi cavabdan sonra yaranan mövcud vəziyyət müzakirə olunmuşdu.
Trampın Ukrayna üzrə xüsusi nümayəndəsi Stiv Uitkoff görüşlərdən sonra ABŞ və Ukrayna nümayəndə heyətləri arasında mühüm irəliləyişlərin əldə olunduğunu bəyan etmişdi.
