Son dəqiqə

Hakan Fidan: Bir gün Avropa Türkiyəyə yalvaracaq

Dünya

Türkiyənin xarici işlər naziri Hakan Fidan Avropa Birliyinin (AB) Türkiyəyə münasibətini sərt tənqid edərək bildirib ki, Avropa Birliyi Türkiyəyə qarşı kimlik əsaslı siyasət yürüdür və gələcəkdə Avropa ölkələri Türkiyənin AB-yə üzv olması üçün “xahiş edirik, gəlin” deyərək yalvarmaq məcburiyyətində qalacaqlar.

 

Cagdas.az xəbər verir ki, Sky News Arabia telekanalına verdiyi müsahibədə Yaxın Şərqdəki proseslərlə yanaşı, Türkiyənin Avropa Birliyi ilə münasibətlərinə də toxunan Fidan, AB-nin Türkiyəni fərqli din və sivilizasiyaya məxsus ölkə kimi görərək kənarda saxladığını vurğulayıb.

“AB Türkiyəyə qarşı kimlik siyasəti aparır”

Hakan Fidan qeyd edib ki, Avropa Birliyinin Türkiyəyə münasibəti sırf siyasi arqumentlərə deyil, kimlik və mədəni fərqlərə əsaslanır. Onun sözlərinə görə, bu yanaşma davam etdiyi müddətdə Türkiyənin AB üzvlüyü mümkün deyil.

“Türkiyə olsaydı, Brexit baş verməzdi”

Nazir bildirib ki, əgər Türkiyə vaxtında Avropa Birliyinə qəbul edilsəydi, Birlik bu gün yaşadığı bir çox böhranla üzləşməzdi:

“Türkiyə AB-nin üzvü olsaydı, Brexit olmazdı, Böyük Britaniya Birlikdən ayrılmazdı və Avropa Birliyi daha güclü, daha dayanıqlı bir struktur halına gələrdi.”

“O gün gələndə qərarı biz verəcəyik”

Gələcəyə dair diqqətçəkən proqnoz verən Hakan Fidan deyib ki, zamanla Avropa ölkələri Türkiyəyə ehtiyac duyacaq:

“Gün gələcək, Avropa ‘xahiş edirik, gəlin’ deyərək Türkiyəyə yalvaracaq. O zaman isə qərarı verən tərəf biz olacağıq.”

“Dünyanın ehtiyacı birlikdə yaşamaqdır”

Nazir çıxışının sonunda qlobal problemlərə toxunaraq bildirib ki, bəşəriyyətin əsas problemi ayrı-seçkilik deyil, birgə yaşamaq mədəniyyətinin zəifliyidir. Onun fikrincə, dünyanın ehtiyacı fərqli mədəniyyət və sivilizasiyaların eyni çətir altında dinc şəkildə bir arada yaşamasıdır.