İsrail Qolan ərazisində Suriyanın Quneytra vilayətinə hərbi müdaxilə edib
Ayrı bir məlumatda isə bildirilir ki, Suriya hökuməti ilə druz silahlı qrupları iyul ayında baş verən qanlı toqquşmalardan sonra ilk dəfə olaraq Suvayda vilayətində məhbus mübadiləsi həyata keçiriblər.
Çağdaş.Az-ın yerli KİV-ə istinadən məlumatına görə, onlarla İsrail hərbi texnikası işğal altında olan Qolan Təpələri ərazisində yerləşən Suriyanın cənub-qərbindəki Quneytra vilayətinə daxil olaraq ölkənin suverenliyinin növbəti dəfə pozulmasına yol verib.
“Al-Ikhbariah” TV kanalının çərşənbə günü yaydığı məlumata görə, təxminən 30 hərbi maşından ibarət İsrail konvoyu Quneytrada “Tel əl-Əhmər”in şərq hissəsinə, Ayn Zivan kəndi yaxınlığına daxil olub. Bildirilir ki, İsrail ordusu həmin ərazidə axtarış əməliyyatı həyata keçirib.
Hadisə bölgədə gərginliyi daha da artırmaqla yanaşı, Suriyanın ərazi bütövlüyü və təhlükəsizliyi ilə bağlı narahatlıqları yenidən gündəmə gətirib.
