Almaniyanın ən yüksək qərarverici qurumlarından biri olan Milli Təhlükəsizlik Şurası Alman Silahlı Qüvvələrinin Hörmüz boğazında yerləşdirilməsi ilə bağlı təklifi təsdiqləyib.
Çağdaş.Az xəbərverir ki, Friedrik Merzin sədrliyi ilə keçirilən fövqəladə iclasda İran müharibəsindən sonra artan enerji qiymətləri, enerji təhlükəsizliyi və əlavə tədbirlər müzakirə olunub.
Toplantıda bildirilib ki, hazırda ölkədə yanacaq çatışmazlığı yoxdur və ehtiyatlar kifayətdir. Bununla belə, mövcud gərginlik fonunda vəziyyətin yaxından izlənməsi üçün Enerji Nazirliyi nəzdində fəaliyyət göstərən Enerji Təchizatı İşçi Qrupunun daha geniş tərkibli komitəyə çevrilməsi qərara alınıb. Bu komitə enerji təhlükəsizliyi sahəsində koordinasiyanı təmin edəcək və mümkün enerji böhranına hazırlıqlara cavabdeh olacaq.
“Kölgə donanması”na qarşı tədbirlər
Şurada Rusiyanın sanksiyalardan yayınmaq üçün istifadə etdiyi “kölgə donanması”na qarşı daha sərt tədbirlər də razılaşdırılıb. Qeyd olunub ki, Rusiya digər ölkələrin bayraqları altında fəaliyyət göstərən köhnə tanker və gəmilərdən istifadə edir. Almaniyanın ərazi sularından keçən bu gəmilərə qarşı görüləcək tədbirlərin detalları təhlükəsizlik səbəbilə açıqlanmayıb.
Hörmüzdə mümkün missiya
İclasda həmçinin İran münaqişəsində uzunmüddətli atəşkəs əldə olunacağı təqdirdə Almaniyanın Hörmüz boğazında beynəlxalq missiyaya qoşulması məsələsi də müzakirə edilib. Şura, hüquqi prosedurlar və parlament təsdiqindən sonra Alman Silahlı Qüvvələrinin bu bölgədə yerləşdirilməsini nəzərdə tutan təklifi qəbul edib.
Hərbi qurumlara mümkün missiya ilə bağlı planlamaların davam etdirilməsi tapşırılıb.
Sonda Şura hərbi tikinti və strateji əhəmiyyətli layihələrə daha çox üstünlük verilməsi barədə də qərar qəbul edib.
