Azərbaycanda təhsil sistemində rəqəmsallaşma sürətlə genişlənir. Elektron jurnal və “Rəqəmsal məktəb” kimi platformaların tətbiqi müəllim, şagird və valideyn arasında əlaqəni asanlaşdırsa da, bəzi hallarda bu sistemlərdən istifadə zamanı yaranan problemlər diqqət çəkir. Xüsusilə İKT bacarıqları zəif olan müəllimlərin çətinlik yaşaması və məlumatların üçüncü şəxslər tərəfindən daxil edilməsi həm texniki, həm də təhlükəsizlik baxımından risklər yaradır.
Cagdas.az xəbər veriri ki Referans Media-ya açıqlama verən İT mütəxəssisi Kamran Əsədullayev bildirib ki, Azərbaycanda məktəblərdə rəqəmsallaşma sürətlə gedir və bu sistemlər ümumilikdə faydalıdır. Lakin hamının bu platformalara eyni səviyyədə hazır olmadığını qeyd edən mütəxəssis vurğulayıb ki, xüsusilə kompüter bacarıqları zəif olan bəzi müəllimlər istifadə zamanı çətinlik çəkir.
Onun sözlərinə görə, bəzi hallarda müəllimlər sistemi düzgün istifadə edə bilmədikləri üçün başqalarından kömək istəyir və öz login-şifrələrini üçüncü şəxslərlə paylaşırlar: “Hətta qiymət və davamiyyət məlumatlarını da həmin şəxslər sistemə daxil edir. Bu, sadə görünsə də, əslində ciddi riskdir”.
İT mütəxəssisi qeyd edib ki, bu cür hallarda üçüncü şəxs məlumatları dəyişə, silə və ya səhv daxil edə bilər: “Sonradan kimin nə etdiyini sübut etmək çətinləşir. Bu isə həm müəllimin nüfuzuna, həm də şagirdin qiymətləndirilməsinə mənfi təsir göstərir”.
Problemin həlli yollarına toxunan Kamran Əsədullayev bildirib ki, ilk növbədə müəllimlər üçün sadə və praktik təlimlər təşkil olunmalıdır: “Uzun və mürəkkəb təlimlər yox, qısa videolar, addım-addım izahlar və məktəbdaxili dəstək daha effektivdir. Eyni zamanda məktəblərdə İT mütəxəssisinin olması müəllimlər üçün ciddi köməkdir”.
Təhlükəsizlik məsələlərinə də diqqət çəkən mütəxəssis vurğulayıb ki, əsas qayda şifrələrin paylaşılmamasıdır. Bundan əlavə, sistemlərdə iki mərhələli giriş, edilən dəyişikliklərin qeydiyyatı və şübhəli hallarla bağlı xəbərdarlıq mexanizmləri tətbiq olunmalıdır.
O, həmçinin qiymətlərin səhv və ya bilərəkdən yanlış daxil edilməsi riskinə qarşı sistemdə əlavə nəzarət mexanizmlərinin yaradılmasının vacibliyini qeyd edib: “Qiymət dəyişiklikləri tarixçədə saxlanmalı, rəhbərlik tərəfindən izlənilməli və bəzi hallarda əlavə təsdiq tələb olunmalıdır”.
Sonda mütəxəssis bildirib ki, rəqəmsallaşma müsbət addımdır, lakin onun effektivliyi istifadəçilərin bilik və yanaşmasından asılıdır: “Müəllimlərə dəstək verilsə və təhlükəsizlik qaydalarına əməl olunsa, bu sistemlər daha faydalı olacaq”.
