Səudiyyə Ərəbistanı Liqasının 30-cu turunda “Əl-Nəsr” öz meydanında “Əl-Əhli”ni 2:0 hesabı ilə məğlub edib.
Cagdas.az xəbər verir ki, mübarizənin yekun fiti ilə birlikdə hər iki komandanın oyunçuları arasında gərgin anlar yaşanıb. “Əl-Əhli”də çıxış edən Türkiyə milli komandasının futbolçusu Merih Dəmiral oyun zamanı ona qarşı çox sərt müdaxilə edən Kinqsli Komanın üzərinə yeriyincə mühafizəçilər araya girməli olub.
Futbolçuların müdaxiləsindən sonra Merih “Yuventus”dakı keçmiş komanda yoldaşı Kriştiano Ronaldo ilə də mübahisə yaşayıb. “Əl-Nəsr” futbolçularının təhrikedici hərəkətlərindən sonra türkiyəli futbolçu Asiya Çempionlar Liqası medalını “Əl-Nəsr” azarkeşlərinə nümayiş etdirib.
Dəmiral stadionu tərk edərkən mətbuat nümayəndələrinə verdiyi açıqlamada belə deyib:
“Ayağımın vəziyyətinə baxın! Ayağım qırılacaqdı! Hamı “Əl-Nəsr”in çempion olması üçün kömək edir. Hər kəs “Əl-Nəsr”in kubok qazanmasını istəyir. Bu, utancvericidir. Əlhəmdülillah, “Əl-Əhli” hər zaman heç kimin köməyi olmadan qalib gəlir”.
Merih Dəmiral “X” (keçmiş Twitter) hesabında medalını tribunlara göstərdiyi anları paylaşaraq bu sözləri qeyd edib: “İlk dəfədir ki, onların stadionunda Çempionlar Liqası medalı var”.(ölkə.az)
