Hakan Fidan Qətərin paytaxtı Dohada keçirdiyi mətbuat konfransında Tamim bin Hamad Al Thani ilə görüşündən sonra Hörmüz boğazı ilə bağlı mühüm mesajlar verib.
Çağdaş.Az-ın xəbərinə görə, Fidan bildirib ki, Hörmüz boğazının açıq qalması həm regional təhlükəsizlik, həm də dünya iqtisadiyyatı baxımından həyati əhəmiyyət daşıyır:
“Hörmuz boğazının silah kimi istifadə olunmaması yalnız regional sabitlik və təhlükəsizlik üçün deyil, həm də qlobal iqtisadiyyat üçün son dərəcə vacibdir.”
Türkiyənin boğazın açılması istiqamətində göstərilən bütün səyləri dəstəklədiyini vurğulayan Fidan, əsas prioritetin diplomatik və sülh yolu ilə problemin həll edilməsi olduğunu qeyd edib.
Türkiyə xarici işlər naziri çıxışında həmçinin Qəzza məsələsinə də toxunaraq, İsrailin bölgədəki siyasətinin Yaxın Şərqdə əsas təhlükəsizlik problemlərindən biri olaraq qaldığını bildirib. O, Qəzza, Beyrut, İordan çayının qərb sahili və Suriyada baş verən hadisələrin minlərlə insanın həyatına təsir etdiyini vurğulayıb.
