Moskva və Tehran arasında hərbi-texniki əməkdaşlıq yeni və daha təhlükəli mərhələyə qədəm qoyur. Rusiyanın İrana çoxməqsədli qırıcı təyyarələrlə yanaşı, geniş arsenalda raket sistemləri də tədarük etdiyi məlum olub.
Çağdaş.Az xəbər verir ki, Ukrayna kəşfiyyatının əldə etdiyi və mətbuata sızdırılan məlumatlara görə, Rusiya İrana “Su-35” qırıcı təyyarələrində istifadə olunmaq üçün ən azı 327 ədəd “hava-hava” və “hava-yer” tipli raket satıb.
Sözügedən hərbi sazişin detalları hələ bir müddət əvvəl ortaya çıxmağa başlamışdı. Ötən ilin dekabr ayında sızdırılmış sənədlərin dərc olunması ilə İranın Rusiyadan ümumilikdə 16 ədəd “Su-35” qırıcı təyyarəsi sifariş etdiyi ifşa olunmuşdu. Ukrayna kəşfiyyat mənbələrinin hesabatlarına əsasən, həmin qırıcıların Tehrana çatdırılması 2025-2027-ci illər arasında planlaşdırılıb və hazırda bu proses qrafikə uyğun olaraq icra edilməkdədir.
Ekspertlər Rusiyanın İranı müasir aviasiya və raket silahları ilə təchiz etməsinin təkcə Yaxın Şərqdəki qüvvələr balansını deyil, həm də qlobal təhlükəsizlik arxitekturasını ciddi şəkildə təhdid etdiyini vurğulayırlar./Musavat.com/
