Xəbər verdiyimiz kimi, Yasamal rayonunda Hacı Zeynalabdin Tağıyevin XX əsrin əvvəllərində inşa etdirdiyi su anbarının üzərində restoran fəaliyyətə başlayıb. Bu isə ictimaiyyətdə narazılığa səbəb olub.
Cagdas.az xəbər veriri ki Globalinfo.az məsələ ilə bağlı Yasamal Rayon İcra Hakimiyyətinə sorğu ünvanlayıb.
Qurumdan bildirilib ki, tarixi abidələrə nəzarət onların səlahiyyətlərinə aid deyil:
“Tarixi abidələrə biz nəzarət etmirik. Bununla bağlı Yasamal Rayon İcra Hakimiyyətinə müraciət olunmayıb. Həmçinin bu cür fəaliyyət üçün bizdən icazə alınması tələb olunmur. Çünki icazə verib-verməmək bizim səlahiyyətimizdə deyil”.
Qeyd edək ki, sözügedən tarixi tikili 1913-1917-ci illərdə inşa edilmiş “+82 Qərb” su anbarıdır. Bakı şəhərinin ilk mərkəzləşdirilmiş su anbarlarından biri olan bu obyekt paytaxtın su təchizatında mühüm rol oynayıb və hazırda Yasamal Parkının ərazisində yerləşir.
Tikili Birinci Bakı su kəmərinin və məşhur Şollar suyu sisteminin tərkib hissəsi kimi şəhərin mərkəzi hissəsinin içməli su ilə təmin olunması məqsədilə yaradılıb.
Azərbaycan Respublikası Prezidentinin tapşırığı əsasında 2014-cü ildə tarixi memarlıq üslubuna uyğun olaraq bu anbarın üzərində geniş və müasir istirahət parkı salınıb.
Hazırda park ictimai istirahət məkanı kimi fəaliyyət göstərir, su anbarı isə tarixi infrastruktur obyekti kimi qorunur.
