İranın sabiq ali dini lideri ayətullah Əli Xameneinin dəfn mərasimi iyunun 26-dan sonra baş tutacaq.
Cagdas.az xəbər verir ki, bu barədə İranın Tasnim agentliyi məlumat yayıb.
Agentliyin məlumatına görə, xarici KİV-lərdə Xameneinin dəfn tarixi ilə bağlı yayılan xəbərlər həqiqəti əks etdirmir. Bildirilir ki, vida və dəfn mərasimlərinin Məhərrəm ayının ilk ongünlüyündən sonra keçirilməsi planlaşdırılır.
Tehran meri Əlirza Zakani isə bildirib ki, Xameneinin dəfni Məhərrəm ayının ikinci ongünlüyündə, təxminən iyunun sonu – iyulun əvvəllərində baş tuta bilər. Bu barədə “Iran International” məlumat yayıb.
Qeyd olunub ki, mərasimlər dövlət səviyyəsində və bütün rəsmi ehtiram qaydalarına uyğun təşkil ediləcək. Dəfn mərasimləri üç gün davam edəcək və ölkənin müxtəlif şəhərlərini əhatə edəcək. Tədbirlərin Tehranda və əsas dini mərkəzlərdə keçirilməsi nəzərdə tutulur. Paytaxtdakı vida mərasiminin ən azı 24 saat davam edəcəyi bildirilir.
Məlumata görə, Xameneinin dəfn olunacağı yer kimi ölkənin şərqində yerləşən Məşhəd şəhəri seçilib. Buraya Pakistan və Əfqanıstan da daxil olmaqla qonşu ölkələrdən çoxsaylı insanların gələcəyi gözlənilir. Bundan əlavə, Qum şəhərində də genişmiqyaslı anım yürüşünün keçirilməsi planlaşdırılır.
Xatırladaq ki, yayılan məlumatlara əsasən, Əli Xamenei və ailəsinin bir neçə üzvü fevralın 28-də Tehrana həyata keçirilən ABŞ və İsrailin birgə hücumu zamanı həlak olub. Daha sonra onun oğlu Müctəba Xameneinin varis seçildiyi bildirilir.(sfera.az)
