2025-ci ildə dövlətin sosial-iqtisadi inkişaf prioritetlərinin və digər zəruri xərclərinin maliyyələşdirilməsi tam və vaxtında təmin olunub.
Cagdas.az xəbər verir ki, bunu maliyyə naziri Sahil Babayev Milli Məclisin plenar iclasında “2025-ci il dövlət büdcəsinin icrası haqqında” qanun layihəsinin müzakirəsi zamanı deyib.
Nazirin sözlərinə görə, ötən il dövlət büdcəsinin xərcləri proqnozun 93,2 faizi səviyyəsində və ya 38,6 milyard manat həcmində icra olunub. Bu göstərici 2024-cü illə müqayisədə 891 milyon manat və ya 2,4 faiz çoxdur.
S.Babayev qeyd edib ki, son beş ildə dövlət büdcəsinin xərcləri ümumilikdə 11,2 milyard manat və ya 41 faiz artıb. Dövlət büdcəsi xərclərinin 22,1 milyard manatı (57,3 faiz) cari xərclərə, 14,4 milyard manatı (37,3 faiz) əsaslı xərclərə, 2,1 milyard manatı (5,4 faiz) isə dövlət borcu və öhdəliklərinə xidmətlə bağlı ödənişlərə yönəldilib.
Nazir vurğulayıb ki, hesabat ilində icra olunan 22,1 milyard manatlıq cari xərclərin 92 faizi və ya 20,4 milyard manatı qeyri-neft-qaz sektoru üzrə daxilolmalar hesabına qarşılanıb.
Onun sözlərinə görə, bu göstərici dövlət büdcəsinin qeyri-neft gəlirləri hesabına maliyyələşdirilməsi imkanlarının genişləndiyini və iqtisadiyyatın şaxələndirilməsi istiqamətində görülən tədbirlərin nəticə verdiyini göstərir.
