Ermənistanın işğalı nəticəsində Azərbaycana dəyən zərər ən konservativ hesablamalara görə 150 milyard ABŞ dollarından çoxdur.
Cagdas.az xəbər verir ki, bunu Milli məclisin bu gün keçirilən növbədənkənar sessiyası çərçivəsində keçirilən plenar iclasında deputat Rizvan Nəbiyev “Azərbaycan Respublikasının 2025-ci il dövlət büdcəsinin icrası haqqında” layihənin müzakirəsi zamanı bildirib.
“Bu gün azad edilmiş ərazilərdə həyata keçirilən bərpa və yenidənqurma işləri dövlət üçün ciddi maliyyə yükü yaradır. Zəfərdən sonra həmin ərazilərə 25 milyard manatdan çox vəsait ayrılıb və növbəti illərdə də bu proses davam edəcək”, – deputat qeyd edib.
Rizvan Nəbiyev bildirib ki, azad edilmiş ərazilərdə regionların iqtisadi profilinə uyğun sənaye imkanlarının inkişaf etdirilməsi xüsusi əhəmiyyət daşıyır.
Onun sözlərinə görə, Ağdam Sənaye Parkı və Araz Vadisi İqtisadi Zonası kimi layihələr hər bir regionun potensialına uyğun şəkildə formalaşdırılır və iqtisadi inkişafın sürətlənməsinə xidmət edir.
