Son illər Azərbaycanda gül buketlərinin qiymətləri ciddi müzakirə mövzusuna çevrilib. Müştərilər deyirlər ki, əvvəllər eyni məbləğə daha iri və zəngin görünən buketlər almaq mümkün idi, indi isə 100 manata belə cəmi 10-15 qızılgüldən ibarət buket təklif olunur.
2023-cü ildə yayılan statistikaya görə, Azərbaycana idxal edilən bir qızılgülün orta gömrük dəyəri təxminən 2,2 manat olub, bəzi mağazalarda isə həmin dövrdə bir ədəd qızılgül 8-9 manata satılıb. Bu da gömrük dəyəri ilə pərakəndə satış qiyməti arasında təxminən 4 dəfə fərq olduğunu göstərirdi.
Gül buketinin baha olma səbəbi nədir?
Cagdas.az xəbər verir ki, globalinfo.az-a danışan iqtisadçı Natiq Cəfərli deyib ki, bu, tənzimlənən qiymət deyil və dövlət tərəfindən müəyyən edilmir:
“Güllərin qiyməti əsasən tələb-təklif münasibətləri və maya dəyəri əsasında formalaşır. Azərbaycanda satılan güllərin böyük əksəriyyəti xaricdən gətirildiyi üçün onların qiyməti idxal xərclərindən və xarici bazarlardakı qiymətlərdən birbaşa asılı olur. Qiymətlərin yüksək olmasının əsas səbəbləri yerli istehsalın az olması, xaricdən gətirilən güllərin bahalaşması və bazardakı tələb-təklif nisbətidir. Güllər tez xarab olan məhsul olduğundan onların uzun müddət saxlanılması mümkün deyil. Buna görə də satıcılar məhsulu qısa müddətdə realizə etməyə çalışırlar”.
İqtisadçının sözlərinə görə, əgər müəyyən qiymətə alıcı olmasa, təbii ki, qiymətlər aşağı düşər:
“Deməli, bazarda həmin qiymətlərə tələbat var ki, qiymətlər də o səviyyədə qalmağa davam edir. Bu baxımdan, gül bazarında qiymətlərin formalaşması tamamilə bazar mexanizmlərinin təsiri altında baş verir”.
