Ukrayna Prezidenti Volodimir Zelenski Fransanın Evian-le-Ben şəhərində keçirilən G7 sammiti zamanı Fransa Prezidenti Emmanuel Makronun tədbirdə daha uzun müddət qalmaqla bağlı xahişini rədd edib.
Cagdas.az xəbər verir ki, bu barədə “New York Post” məlumat yayıb.
Məlumata görə, Zelenski fransalı həmkarına bildirib ki, onu Brüsseldə gözləyirlər. Ehtimal olunur ki, bu, Ukraynanın Avropa İttifaqına üzvlük müraciəti ilə bağlıdır.
Bundan sonra Makron Zelenskidən ABŞ Prezidenti Donald Trampla ikitərəfli görüş barədə razılıq əldə edib-etmədiyini soruşub. Nəşrin yazdığına görə, Ukrayna lideri bu suala mənfi cavab verib.
Ağ Evin nümayəndələri G7 sammiti başlamazdan əvvəl keçirdikləri brifinqdə bildiriblər ki, Trampın Zelenski ilə ayrıca görüşü nəzərdə tutulmur. Bununla belə, onlar liderlərin sammit çərçivəsində qeyri-rəsmi söhbət edə biləcəyini istisna etməyiblər.
Bundan əvvəl Avropanın Ukraynanı dəstəkləyən müttəfiqlərinin G7 sammitində ABŞ Prezidenti Donald Trampla fikir ayrılığı yaşamaqdan ehtiyat etdiyi barədə məlumat yayılmışdı. Onlar həmçinin Trampın İran məsələsini gündəmdən çıxardıqdan sonra diqqətini yenidən Ukrayna böhranına yönəldərək Avropa liderlərini ikinci plana keçirəcəyindən narahatdırlar.(sfera.az)
