ABŞ prezidenti Donald Tramp və Çin lideri Si Cinpin Ağ Evdə dövlət səviyyəli şam yeməyində görüşərkən onların həyat yoldaşları Melaniya Tramp və Pen Liyuan da geyimləri ilə diqqət çəkiblər.
Cagdas.az xəbər verir ki, ABŞ-Çin münasibətlərində gərginliyin artdığı, xüsusilə süni intellektin tənzimlənməsi ilə bağlı fikir ayrılıqlarının müzakirə edildiyi bir vaxtda iki ölkənin lideri Ağ Evdə rəsmi şam yeməyində bir araya gəlib.
“Washington Post”un yazdığına görə, həmin gecənin əsas diqqətçəkən görüntülərindən biri də iki birinci xanımın tamamilə fərqli geyim seçimləri olub.
63 yaşlı Pen Liyuan mərasim üçün ənənəvi Çin geyim üslubunu xatırladan, dik yaxalı, uzun və sərbəst biçimli qırmızı libas seçib. Çin mədəniyyətində firavanlığın simvolu sayılan qırmızı rəngi o, ikiqat ağ mirvari boyunbağı ilə tamamlayıb.
73 yaşlı Si Cinpin isə Çin rəsmi geyiminin ənənəvi variantlarından biri hesab olunan qara Mao kostyumunda olub.
Donald Tramp klassik Qərb üslubuna üstünlük verərək qara smokin geyinib.
Lakin gecənin əsas moda sürprizi Melaniya Trampın seçimi olub.
ABŞ-ın birinci xanımı rəsmi pşam yeməyində qadınların ənənəvi olaraq uzun gecə libaslarına üstünlük verdiyi formatdan kənara çıxaraq şalvar geyinib.
Melaniya “Dolce & Gabbana” brendinin qara jakard şalvarını, eyni brendin ipək qurşağını və boyun hissəsində “Saint Laurent”in iri bantı olan ağ pambıq bluzunu seçib. Görünüşünü “Christian Louboutin” ayaqqabıları tamamlayıb.
Bu seçim Melaniyanın üslubuna da uyğun hesab olunur. O, rəsmi tədbirlərdə klassik uzun libas əvəzinə dəfələrlə daha cəsarətli və qeyri-standart geyimlərə üstünlük verib.
Pen Liyuanın moda dünyasındakı tanınmışlığı isə Çin liderinin həyat yoldaşı olmasından xeyli əvvələ gedib çıxır.
Si Cinpin dövlət başçısı olmamışdan əvvəl məşhur müğənni olan Pen Liyuan sonradan Çinin birinci xanımı kimi də ölkədə və beynəlxalq aləmdə diqqət çəkən simalardan birinə çevrilib.
Onun geyim üslubunda qədim və ənənəvi Çin geyimlərinin elementləri müasir Qərb biçimləri ilə birləşdirilir. 2013-cü ildə, Si Cinpinin hakimiyyətə gəlişindən qısa müddət sonra Pen Liyuan “Vanity Fair” jurnalının dünyanın ən yaxşı geyinən qadınları siyahısına daxil edilib.
Onun bir çox geyimləri Çin dizayneri Ma Kenin adı ilə əlaqələndirilir. Dizaynerin yaradıcılığında ekoloji və təkrar emal olunmuş materiallardan istifadə ilə yanaşı, ənənəvi Çin biçim və tikiş texnikalarına da yer verilir.
Melaniya Tramp da dövlət başçısının həyat yoldaşı olmamışdan əvvəl model kimi tanınırdı. Lakin iki birinci xanım Ağ Evdə və beynəlxalq tədbirlərdə fərqli moda strategiyalarına üstünlük verirlər.
Bir çox ölkələrin birinci xanımları rəsmi tədbirlərdə yerli moda evlərinin geyimlərini seçməklə milli sənayeyə dəstək nümayiş etdirirlər. Melaniya isə tez-tez Avropa və beynəlxalq məşhur dizaynerlərin geyimlərinə üstünlük verir.
O, rəsmi mərasimlərdə qadınların uzun ziyafət libasları geyinməsi ənənəsindən də bir neçə dəfə kənara çıxıb. 2025-ci ildə Qubernatorlar Assosiasiyasının şam yeməyində qadın smokinqi geyinən Melaniya 2026-cı ildə həmin tədbirdə bu dəfə diqqətçəkən gümüşü şalvarla görünmüşdü.
Bu dəfə isə Ağ Evdəki dövlət şam yeməyində onun şalvar seçimi Pen Liyuanın ənənəvi qırmızı ipək libası ilə kəskin kontrast yaradıb.
Beləliklə, həmin axşam iki fərqli geyim tərzi də diqqət çəkib: biri müasirlik və eksperimentə açıqlığı, digəri isə ənənə və klassik mərasim üslubunu nümayiş etdirib.\modern.az\
