Ermənistanın Baş naziri Nikol Paşinyanın keçmiş həyat yoldaşı Anna Akopyan ABŞ-də keçiriləcək Birinci Xanımların Qlobal Akademiyasının illik tədbirində Ermənistanı təmsil edəcək.
Cagdas.az xəbər verir ki, məlumata görə, tədbir Nyu-York şəhərində baş tutacaq və Akopyan burada hökumət başçısının həyat yoldaşı statusunda iştirak edəcək. Onun səfəri ilə bağlı ezamiyyət sərəncamı Paşinyan tərəfindən iyunun 11-də imzalanıb.
26 iyun – 4 iyul tarixlərini əhatə edəcək səfərin xərclərinin müəyyən olunmuş qaydada ödənilməsi barədə hökumət aparatına tapşırıq verilib. Lakin səfər üçün ayrılan vəsaitin məbləği açıqlanmayıb.
Qeyd edək ki, Anna Akopyan 17 fevral 2026-cı ildə sosial şəbəkə hesabında paylaşım edərək özü ilə Nikol Paşinyan arasında mövcud olan vətəndaş nikahının başa çatdığını elan etmişdi. O, paylaşımında ictimaiyyətdən bu məsələyə həssas və təmkinli yanaşmağı xahiş etmişdi.
Xatırladaq ki, onların dörd övladı var.(milli.az)
